Рус телендәге версияПартнёрлык проектларыМахсус проектлар
Телне алыштыру
РУВИКИ ТУРЫНДА

Наил Гәрәев

Бу терминның башка аңлатмалары да бар, аларны карау өчен Гәрәев битенә күчегез.

Наил Мөхәммәтгәрәй улы Гәрәев (рус. Наи́ль Мухаметгарие́вич Гара́ев; 22 март 1932, Гали (Самара өлкәсе), Урта Идел крае) — СССР классик стиль көрәшчесе, тренер һәм бөтенсоюз категориясендәге хөкемдар. Дөнья чемпионатының көмеш призёры (1955), СССР чемпионы (1954), СССР чемпионатларының ике тапкыр көмеш призёры (1959, 1960), РСФСРның ике тапкыр чемпионы (1954, 1958). СССРның атказанган спорт остасы (1955), РСФСРның атказанган тренеры (1971).

Тәрҗемәи хәле

1932 елның 22 мартында Урта Идел краеның (хәзерге Самара өлкәсе) Похвистнево районы Гали авылында туа[1].

Яшьтән үк Сабантуй бәйрәмнәрендә милли көрәштә чыгыш ясый[2]. Уналты яшендә Куйбышевка күчеп килә, анда 9 нчы һөнәр училищесына укырга керә[1].

Классик көрәш белән 1952 елда «Маяк» спорт җәмгыятендә шөгыльләнә башлый[1].

Ленинград физик культура техникумын, 1967 елда «физик тәрбия укытучысы» белгечлеге буенча Омск дәүләт физик культура институтын тәмамлый[1].

2016 елның 4 апрелендә Самарада вафат була, Гали авылында җирләнгән[3].

Спорт эшчәнлеге

1952—1958 елларда Куйбышевның «Маяк» спорт клубы өчен, 1959-1963 елларда Армия спорт клубы (СКА, Куйбышев) өчен иң җиңел авырлык категориясендә (52 кг га кадәр) чыгыш ясый[1].

1954 елда шәхси һәм команда зачетларында СССР чемпионатында, шулай ук РСФСР чемпионатында җиңү яулый[1]. 1955 елның апрелендә СССР җыелма командасы составында Карлсруэда узган классик көрәш буенча дөнья чемпионатында, финалда итальянлы Иньяцио Фабрага оттырып, көмеш медаль ала[4].

1956 елда Мельбурндагы XVI җәйге Олимпия уеннарында СССР олимпия җыелма командасына керә[2].

1959 елда Мәскәүдә узган СССР халыкларының II җәйге Спартакиадасында көмеш призёр була, 1960 елда Тбилисидә узган СССР чемпионатында көмеш медаль яулый. 1963 елда зур спорттагы чыгышларын тәмамлый[1].

1967 елдан Идел буе хәрби округының армия спорт клубында, Куйбышевтагы М. В. Фрунзе исемендәге заводның 11 нче һәм «Восход» балалар-яшүсмерләр спорт мәктәпләрендә тренер булып эшли. РСФСР һәм СССР җыелма командаларының тренерлар штабына керә, бөтенсоюз ярышларының хөкемдары була. 20 дән артык СССР спорт остасын һәм өч СССРның халыкара класслы спорт остасын әзерли[1].

Спорттагы казанышлары

  • Классик көрәш буенча дөнья чемпионаты[4]:
    • көмеш медаль — Карлсруэ (1955, 52 кг га кадәр).
  • Классик көрәш буенча СССР чемпионаты[1]:
    • алтын медаль — Рига (1954, шәхси зачет, 52 кг га кадәр);
    • алтын медаль — 1954 (команда зачеты);
    • көмеш медаль — Мәскәү (1959, СССР халыклары Спартакиадасы, 52 кг га кадәр);
    • көмеш медаль — Тбилиси (1960, 52 кг га кадәр).
  • Классик көрәш буенча РСФСР чемпионаты[1]:
    • алтын медаль — 1954;
    • алтын медаль — 1958.

Бүләкләре, мактаулы исемнәре

  • СССРның атказанган спорт остасы (1955);
  • РСФСРның атказанган тренеры (1971);
  • Самара өлкәсенең Похвистнево районының мактаулы гражданины[1][3].

Искәрмәләр

  1. ↑ 1 2 3 4 5 6 7 8 9 10 11 Легенды самарского спорта: Наиль Гараев (рус.). Газета «Самарская газета» (9 апрель 2016). Мөрәҗәгать итү датасы: 2 сентябрь 2026.
  2. ↑ 1 2 Алькино: земля надежды и любви (рус.). Всемирный конгресс татар (3 октябрь 2014). Мөрәҗәгать итү датасы: 2 сентябрь 2026.
  3. ↑ 1 2 Похвистневский район (рус.). Онлайн-энциклопедия Tatarica (1 гыйнвар 2025). Мөрәҗәгать итү датасы: 2 сентябрь 2026.
  4. ↑ 1 2 Гараев Наиль Мухаметгариевич | Федерация спортивной борьбы Самарской области [неопр.]. wrest63.ru. Мөрәҗәгать итү датасы: 3 сентябрь 2026.

Сылтамалар

Тема буенча өстәмә

Төркемнәр