Алексей Наумов (1972)

Ленинград футболы тәрбияләнүчесе («Кировец» балалар-яшүсмерләр спорт мәктәбе). 1990 елның ахырында «Кировец» командасыннан Ленинградның «Зенит» клубына чакырыла. «Зенит» составында алты сезон үткәрә, Россиянең югары һәм беренче лигаларында чыгыш ясый. Сәламәтлеге белән бәйле проблемалар аркасында 1997 елгы сезонны тулысынча калдыра. Соңрак Алексей Наумов интервьюларында рак белән авыруы һәм химиотерапия сеанслары арасында футбол кырына чыгуы турында сөйли^[2].

1998 елны икенче дивизиондагы «Зенит-2» командасында башлап җибәрә, сезон уртасында «Тюмень» футбол клубына күчә. Соңгы турдагы «Зенит» — «Тюмень» матчында элеккеге командасына каршы уйный. «Зенит»ка УЕФА Кубогына эләгү өчен җиңәргә кирәк була, әмма алдагы 29 уенда барлыгы 7 очко җыйган «Тюмень» тигез счётны саклап кала ала^[3].

1999 елның беренче яртысын «Зенит»ның элеккеге тренеры Павел Садыринның «Рубин» командасында үткәрә. Киләсе ел ярымны Череповецның «Северсталь» клубында уйнап ала^[4]. 2002 елда Беларусьнең «Торпедо-МАЗ» командасы тренеры Сергей Францев чакыруы буенча (аның белән әле «Кировец» мәктәбендә үк эшләгән булалар) Минскка күчә. 2002 һәм 2003 елларда Белоруссия чемпионатының 22 иң яхшы футболчысы исемлегенә керә, иң яхшы сакчы дип таныла. 2005—2006 елларда Михаил Мархель җитәкчелегендә Брестның «Динамо»сында чыгыш ясый.

2008 елгы сезонны һәвәскәрләрнең «Карелия» ФКнда команда капитаны буларак үткәрә. 2009 елның февраль башында Эстониянең Силламяэ шәһәреннән «Калев» клубы белән контракт төзи һәм анда 2012 елга кадәр уйный. 2013 елда уенчы карьерасын тәмамлый^[5].

С тренерлык категориясенә ия^[2].

1991—1994 елларда БДБ һәм Россиянең яшьләр җыелма командалары өчен уйный.