Рамай Юлдашев
Рамай Заһидулла улы Юлдашев (шулай ук Рамай Юлдаш; 24 март 1970, Ибрай, Оренбург өлкәсе) — татар җәмәгать эшлеклесе, педагог, татар милли хәрәкәте катнашучысы[1].
Тәрҗемәи хәле
1970 елның 24 мартында Ырынбур өлкәсенең Ибрай авылында туа. Биш балалы гаиләдә иң кече бала булып үсә.
Мәктәптә укыганда тарих белән кызыксына, тарихи әдәбият укый, укучыларның иҗтимагый эшчәнлегендә катнаша[1].
Казан дәүләт университетында белем ала, аны 1996 елда тәмамлый. Соңрак мәктәпләрдә гуманитар фәннәр укыта, Казанның 149 нчы татар-төрек лицеенда тарих укытучысы булып эшли. Йошкар-Оладагы Татар мәдәнияте үзәгендә методист, укытучы һәм мәдәни чаралар оештыручы буларак хезмәт итә[1].
Иҗтимагый эшчәнлеге
Университетта укыган елларында татар милли хәрәкәтендә катнаша. Татар яшьләренең мәдәни һәм иҗтимагый чараларын оештыру белән шөгыльләнә. Казандагы «Шәрык» татар яшьләре клубының рәис-координаторы була[1].
Мари Республикасында татар мәдәниятенә багышланган чаралар оештыруда катнаша[1].
Гаиләсе
Әтисе — Ибрай авылыннан, әнисе — Башкортстанның Дәүләкән районы Имай-Карамалы авылыннан. Әтисе киномеханик, соңрак мәктәптә мич ягучы булып эшли[1].