Александр Стоянов

Александр Васильевич Стоянов 1918 елның 12 февралендә яки 30 августында Уфа губернасының Бәләбәй өязе Казангул волосте Шестопаловка (Шестопалово) авылында туа^[1][2][3][4]. Белеме — башлангыч. Хезмәт эшчәнлеген 1934 елда Асылыкүл МТСының механизаторлар мәктәбен тәмамлаганнан соң, «Беренче Май» күмәк хуҗалыгында тракторчы булып башлый. 1938 һәм 1941 елларда Кызыл Армия сафларына алына^[5][6].

1941—1945 еллардагы Бөек Ватан сугышында катнаша. Хезмәт итү дәверендә кызылармеецтан сержантка кадәр юл үтә^[6], элемтәче һәм элемтә бүлеге командиры булып хезмәт итә^[5][7]. Төрле чорларда 12 нче гвардия һәм 113 нче укчылар полклары, 172 нче гаубицалы артиллерия полкы, 134 нче гаубицалы артиллерия бригадасы, 644 нче һәм 228 нче аерым элемтә батальоннары, шулай ук 206 нчы фронтның запас укчылар полкы составында исәпләнә^[6]. Эвакуация һәм кыр госпитальләрендә дәвалана^[6]. 1946 елда демобилизацияләнә^[5][7].

«Беренче Май» күмәк хуҗалыгында тракторчы, басучылык бригадасы бригадиры булып эшли.

Александр Стоянов бригадасы Дәүләкән районында иң югары бодай уңышын 1947 елда ала. 360 гектар мәйданнан гектарыннан 16 һәм аннан да күбрәк центнер бодай алына, аерым кырларның уңышы 30 центнердан артып китә. Югары уңыш күмәк хуҗалыкка икмәк тапшыру планын үтәргә мөмкинлек бирә, биремнән тыш дәүләт амбарларына 3000 пот бодай салына. Югары уңышлылык аркасында, күмәк хуҗалыклар һәр көнгә берәр килограмм арыш, 4,5 килограмм бодай, 300 грамм тары һәм 200 грамм көнбагыш ала. Өстәмә түләүне дә кертеп, бригада әгъзалары көнгә барлыгы 6 килограмм икмәк ала.

Авыл хуҗалыгы тармагында югары җитештерү күрсәткечләре, 28,1 гектар мәйданда һәр гектардан 31,86 центнер бодай уңышы алу өчен, СССР Югары Советы Президиумының 1948 елның 2 апрелендәге Указы белән Александр Стояновка Социалистик Хезмәт Герое исеме бирелә^[5][8].

Ул 1948-1970 елларда Купояр авыл Советы рәисе булып эшли. 1970 елда пенсиягә чыкканчыга кадәр Дәүләкән районының «Россия» күмәк да хезмәт куя^[5][9].

Стоянов Александр Васильевич 1971 елның 19 июнендә Шестопаловка авылында вафат була^[10].

• Социалистик Хезмәт Герое (1948);
• Ленин ордены;
• Кызыл Йолдыз ордены (1945)^[11][12];
• «Батырлык өчен» медале (1944)^[11][12];
• «Сугышчан хезмәтләре өчен» медале (1945)^[11][12];
• «1941—1945 еллардагы Бөек Ватан сугышында Германияне җиңгән өчен» медале (1945)^[11][12];
• «Японияне җиңгән өчен» медале (1945)^[11][12].