Раил Камалов

Раил Исмәгыйль улы Камалов 1932 елның 20 февралендә Башкорт АССРның (хәзерге Башкортстан Республикасы) Кырмыскалы районы, Сәвәләй авылында туа^[1]. Белеме – тулы булмаган урта.

Хезмәт юлын 1942 елда Фрунзе исемендәге күмәк хуҗалыкта башлый. 1952–1955 елларда ССРБ Кораллы Көчләре сафларында хезмәт итә. Армиядән кайткач, яңадан туган хуҗалыгында төрле вазифалар үти. 1957 елның декабрендә тракторчылар курсларына укырга җибәрелә. Укуын тәмамлач, 1958 елның апреленнән тракторчы булып эшли башлый. 1961 елда шикәр чөгендере үстерү буенча механикалаштырылган звено җитәкчесе итеп билгеләнә^[2].

Раил Камалов җитәкчелегендәге звено, хезмәтне оста оештыру нәтиҗәсендә, бер елдан соң ук зур уңышларга ирешә:

• 1962 елда 50 гектар мәйданның һәр гектарыннан 250 центнер шикәр чөгендере җыеп алына;
• 1965 елда 80 гектар мәйданнан алынган уңыш гектарына 311 центнер тәшкил итә;
• 1967 елда шикәр чөгендере уңышы гектарына 414 центнерга җитә.

Ул чорда бер центнер шикәр чөгендеренең үзкыйммәте уртача 1 сум 30 тиен тәшкил иткән (күмәк хуҗалык буенча – 1 сум 89 тиен, район буенча – 2 сум 40 тиен)^[3].

1966 елда Башкортстан Республикасы китап нәшриятында «Алдынгылар трибунасы» сериясендә Раил Камаловның «Гектардан 50 центнер шикәр» дигән китабы (авторы – Башкорт АССРның атказанган агрономы, авыл хуҗалыгы фәннәре кандидаты Х. Г. Терегулов) басыла^[4].

1989 елның 24 мартында вафат була, туган авылында җирләнгән^[5].

1967—1971 елларда — Башкорт АССРның Кырмыскалы сайлау округыннан РСФСР Югары Советының VII чакырылыш депутаты^[6].

• Социалистик Хезмәт Герое исеме, Ленин ордены, «Урак һәм Чүкеч» алтын медале (ССРБ Югары Советы Президиумының 1965 елның 31 декабрендәге Указы) — шикәр чөгендере җитештерүне арттыруда һәм аның уңдырышлылыгын күтәрүдә ирешкән уңышлары өчен^[7];
• Ленин ордены (1976) — Бөтенсоюз социалистик ярышында ирешкән уңышлары, иген һәм башка авыл хуҗалыгы продуктларын җитештерү һәм дәүләткә сату буенча планнарны һәм социалистик йөкләмәләрне үтәүдә күрсәткән хезмәт батырлыгы өчен^[8].