Андрей Князев

Магнитогорскның 4 нче номерлы спорт мәктәбе тәрбияләнүчесе, беренче тренеры — Геннадий Шилин. Профессиональ карьерасын Магнитогорскның «Металлург» клубында башлап җибәрә. 1995 елның җәендә «КАМАЗ»га күчә, Югары лигадагы беренче матчын 1995 елның 5 августында Мәскәүнең «Динамо»сына каршы уйный, ә 12 августта «Жемчужина» белән уенда югары дәрәҗәдәге бердәнбер голын кертә.

1996 елда Андрей Князев Магнитогорск «Металлург»ына кайта һәм анда бик нәтиҗәле сезон үткәрә (24 гол). Киләсе елда ул Казанның «Рубин» клубы белән контракт төзи. 1997 елгы сезонда «Рубин» икенче дивизионның «Үзәк» зонасында җиңүче була, ә Князев 25 гол белән зонаның икенче бомбардиры дип таныла. Шул сезонның барлык рәсми матчларында Князев 30 гол кертә, бу күрсәткеч «Рубин»ның клуб рекордларының берсе булып кала. Беренче дивизионда Князев «Рубин» өчен тагын ел ярым чыгыш ясый, аннары Мәскәүнең «Торпедо-ЗИЛ» һәм Саратовның «Сокол» командаларында уйный.

2002 елдан Князев икенче дивизионда берничә клубны алыштыра: Липецкның «Металлург», «КАМАЗ» һәм Чиләбенең «Лукойл» клубларында уйный. 2004 елда Туланың «Арсенал» клубы өчен беренче дивизионда уйный.

2005 елда Андрей Князев Магнитогорскка кайта һәм икенче дивизионда бер сезон үткәрә. Киләсе сезонда Магнитогорскның «Металлург»ы һәвәскәрләр дәрәҗәсенә күчә, Князев анда уйнавын дәвам итә һәм шул ук вакытта клуб директоры урынбасары булып эшли. 2007 елда уенчы карьерасын тәмамлый.

Казанның Вахитов районы СШОР (олимпия резервындагы спорт мәктәбе) директоры булып эшли. «Рубин» футбол клубы генераль директорының уенчыларны үстерү буенча урынбасары иде^[1]. 2024 елның октябренә кадәр «Рубин» Академиясе директоры вазыйфаларын башкара^[2]. 2025 елда — «Рубин» футбол командасы генераль директорының хатын-кызлар футболын үстерү буенча урынбасары^[3].