Бухта

Бухта (алман. Bucht) — ачык сулыктан (океан, диңгез, күл, сусаклагычтан) берникадәр коры җиргә кереп торган, артык зур булмаган култык.

Алман телендә «бухта» (алман. Bucht) сүзе ике мәгънәдә кулланыла. Бәгъзән, култык (Гудзон култыгы — алман. Hudson-Bucht), бәгъзән исә диңгез (Баффин диңгезе — алман. Baffin-Bucht) мәгънәсен бирә.

Кагыйдә буларак, бухталар кораблар ышыкланып тору өчен хезмәт итә. Кайбер урыннарда бухталар ачык сулыктан коры җир кисәкләре (ярның чыгып торган урыны, кыя, борын, янәшәдәге утраулар, ясалма моллар һ. б. төрле утырмалар) белән аерылып алынган була. Шулар ярдәмендә бухтадагы корабларга көчле дулкыннардан һәм җилдән сакланырга мөмкин була.

Балаклава бухтасы (Акъяр, Севастополь) — Аурупаның иң тирән бухтасы.
Авача бухтасы — Тын океанның Камчатка ярында урнашкан дөньяның иң эре бухталарының берсе. Озынлыгы 24 км, керү юлында киңлеге — 3 км, гомуми мәйданы 215 км². Тирәнлеге 26 м га җитә^[1].