Олугбәк Хамдам

1968 елның 24 апрелендә Үзбәк ССР Әндиҗан өлкәсе Мәрхәмәт районы Югары Равват мәхәлләсендә балта остасы гаиләсендә туган. Урта мәктәпне алтын медальгә тәмамлаган. 1986—1988 елларда Украина ССРда хәрби хезмәт үтә. Ташкент дәүләт университетының филология факультетын (1993), Үзбәкстан Милли университетының филология факультеты каршында аспирантура (1996) тәмамлаган. Бер ел Төркиянең Конья шәһәрендә укыган. «XX гасырның 30нчы елларындагы үзбәк поэзиясендә чиста лирика (Айбәк шигырьләре мисалында)» темасына кандидатлык диссертациясе яклый (1997, фәнни җитәкчесе профессор Умарали Нурматов). «XX гасыр үзбәк поэзиясенең эволюцион фикер үсешендә социаль-психологик нигезләр» темасына докторлык диссертациясе әзерли (фәнни җитәкчесе профессор Наим Каримов).

1993—1994 елларда Ташкент Шәрыкъны өйрәнү институтында төрек теленнән укыта.

1997—2009 елларда Үзбәкстан ФА А. Нәваи исемендәге Тел һәм әдәбият институтында өлкән фәнни хезмәткәр. Ташкент дәүләт университетында (Үзбәкстан Милли университеты) укыта.

2009 елдан «Sharq yulduzi» (Шәрыкъ йолдызы) һәм «Звезда Востока» журналларының берләштерелгән мөхәрририятенең баш мөхәррире^[1].

Проза һәм шигърият өлкәсендә уңышлы эшли. «Тигезләнеш» (1997), «Фетнә һәм буйсыну» (2003), «Сабо һәм Самандар» (2011), «Ялгызлык» (1998), «Ерактагы Дилнура» (2010) роман, повесть һәм хикәяләр җыентыклары, «Аллаһыга илтүче фетнә юлы» (1997), «Гөләп чәчәге» (2005), «Сине көттем» (2007) шигырьләр җыентыгы, «Онытылган най көе» (2013,  [рус.]) җыентыгы һ. б. китаплар авторы. Үзбәк әдәбияты, дөнья халыклары әдәбияты буенча фәнни хезмәтләр язган. Тәрҗемә өлкәсендә уңышлы эшли (Руми)^[2].

• «Шөһрәт» медале (Shuhrat medali, Үзбәкстан) — «Тигезләнеш» (1997) романы өчен.

Өйләнгән, балалары: улы, кызы.