Габделфәт Сафин

1962 елның 11 октябрендә Татарстан республикасының Арча районы, Симетбаш авылында туа. Г. Тукай исемендәге Кырлай урта мәктәбен тәмамлагач, Казан инженер-төзелеш институтында белем ала. Хезмәт юлын «Спартак» аяк киеме берләшмәсендә башлый: башта - цех остасы, соңрак өлкән оста булып эшли. Гомеренең алдагы елларын сәнгатькә багышлый – «Сорнай» фольклор ансамбленә кушылып, иҗат сәфәрләренә чыга^[1].

1992 елда Татарстан дәүләт филармониясендә аны Илһам Шакиров тыңлап һәм, Габделфәт Сафинның махсус музыкаль белеме булмауга карамастан, эшкә кабул итә.

1994 елда ул үзенең «Моң» студиясен һәм иҗат коллективын оештыра.

2001 елда «Акчарлак» газетасын чыгара башлый, соңрак шәхси нәшрият йортын булдыра^[2].

2003 елдан «Уртак түшәк» һәм «Акчарлак сканворды» газетларын бастыра.

2007 елда «Акчарлак-Гармония» һәм «Созвездие-Йолдызлык» журналларын нәшер итә.

2010 елда ТНВ каналында «Яралы язмышлар» исемле тапшырулар циклын алып бара башлый^[3].

Габделфәт Сафин «Ак күлмәгем» җырын башкарганнан соң популярлык казана. Башта бу җыр «хатын-кыз җыры» булып санала, аны Зәйнәп Фәрхетдинова башкара. Ләкин татар телендә «күлмәк» сүзе хатын-кыз күлмәген дә, ир-ат күлмәген дә аңлата. Сафин башкарган вариантта җырдагы «итәк» урынына «яка» сүзе кулланыла^[2].

Ул 200 дән артык җыр башкара, алар арасында «Чияләр», «Авыл көе», «Уфалла арбасы», «Кәтүк түти», «Язмыш», «Соңгы кыңгырау», «Карлы яңгыр», «Син кирәк», «Азалия», «Хушлашма» дигән хитлар бар.

2017 елда «Бөек татар» җырына клип төшерә, ул тиз арада интернетта тарала, һәм әлеге җырны татар халкының рәсми булмаган гимны дип атый башлыйлар^[4].

Даими рәвештә концертлар бирә. 2025 елда Казан, Уфа^[5], Нефтекамск^[6], Яр Чаллы^[7] шәһәрләрендә чыгыш ясый.

• «Хыянәт» (2000);
• «Соңгы кыңнгырау» (2001);
• «Дәрьялар кичкәндә» (2007);
• «Акчарлак-шоу» (2008);
• «Халкыма» (2008);
• «Саумы, Казан! Саумы Татар иле!» (2010);
• «Уфалла арбасы» (2013).

• Татарстан Республикасының халык артисты (2009);
• «Татарстан Республикасы алдындагы казанышлар өчен» ордены медале (2023)^[8];
• «Татар җыры-93» бәйгесе дипломанты (1993);
• «Татар җыры — 2000» фестивалендә «Алтын барс» премиясе лауреаты (2000);
• «Татар җыры — 2001» фестивалендә «Алтын барс» премиясе лауреаты (2001);
• «Татар җыры — 2003» фестивалендә «Алтын барс» премиясе лауреаты (2003);
• «ТАССР төзелүгә 100 ел» медале (2026).

• Габдельфат Сафин. Мин. — Казань: Акчарлак, 2009. — 232 с.

Хатыны — «Акчарлак» нәшрият йорты җитәкчесе Рүзилә Сафина. Кызы — Әдилә, ә улы — Зөлфәт^[9].