Рус телендәге версияПартнёрлык проектларыМахсус проектлар
Телне алыштыру
РУВИКИ ТУРЫНДА

Рамил Юныс

РУВИКИ проектының татар бүлегендә Юнысов фамилияле башка кешеләр турында да мәкаләләр бар


Рамил Мөнәвәр улы Юныс (рус. Рамиль Мунаварович Юнусов; 19 июль 1969, Аксу, Буа районы, Татарстан АССР) — Россия дин эшлеклесе. Кол Шәриф мәчете имам-хатыйбы (2005—2012)[1], Түбән Кама шәһәре имам-мөхтәсибе һәм «Рисаля» мәдрәсәсе ректоры (2002—2005)[2], Казанның Иске Таш мәчетендә икенче имам (2018 елның ноябреннән)[3][4][5].

Тормыш юлы

1969 елның 19 июлендә хәзерге Татарстанның Буа районы Аксу авылында туа. 1986 елда урта мәктәпне көмеш медаль белән тәмамлый. Чик буе гаскәрләрендә хезмәт итә[6]. 1986—1992 елларда А.Н. Туполев исемендәге Казан илкүләм тикшеренү техник университетында (КАИ) белем ала[6], соңрак Казан дәүләт финанс-икътисад институтына күчә[7]. 1992—1997 елларда Мәдинә шәһәрендәге Ислам университетында укый[6]. Аннары Россия ислам институтында «Икътисад» юнәлеше буенча читтән торып белем ала[3].

Рус, татар, гарәп, инглиз һәм төрек телләрен белә[6].

1999—2001 елларда Казанда «Оазис» фәнни-агарту журналын нәшер итә[2].

Дини һәм җәмәгать эшчәнлеге

2002—2005 елларда Түбән Кама шәһәре имам-мөхтәсибе һәм «Рисаля» мәдрәсәсе ректоры булып эшли[2].

2005 елда Татарстан Президенты Минтимер Шәймиев тәкъдиме белән Казанга килә һәм Кол Шәриф мәчетенең имам-хатыйбы вазифасына билгеләнә[1]. Шул ук вакытта «Казан кирмәне» музей-тыюлыгының җәмәгатьчелек белән эшләү буенча директор урынбасары вазифасын да башкара[8].

2008 елның 20 маенда Диния нәзарәте президиумы утырышында Рамил Юныс Татарстан мөфтие беренче урынбасары вазифаларын башкаручы итеп сайлана. Президиумның 13 әгъзасыннан 12 се аның кандидатурасын хуплый[8]. 2010 елга кадәр ул Татарстан Голәмәләр шурасы рәисе, Татарстанның Көньяк казыяты казые һәм Татарстан мөфтиенең беренче урынбасары вазифаларын башкаручы була[2][1].

2011—2012 еллардагы вакыйгалар

2011 елның июнендә Татарстан Республикасы мөселманнары Диния нәзарәте президиумы Рамил Юныска, Түбән Каманың «Рисаля» мәдрәсәсе җитәкчесе Венер Моратовка һәм Түбән Кама шәһәре һәм районы имам-мөхтәсибе Йосыф Дәүләтшинга «шәхси эшкә теркәү белән шелтә» белдерә. Сәбәбе «„Рисаля“ нәшриятында басылган гарәп дин белгече шәех Али бин Аби әл-Изза әл-Хәнәфиненең „Комментарии к вероучению имама Ат-Тахави“ китабының ваһһабичылыкка якын дип табылуы һәм рухи бердәмлекне бозуы» була. Татарстан мөфтие Илдус Фәиз Рамил Юнысны «Рисаля» мәдрәсәсе ректоры вазифасыннан бушата[2].

2012 елның апрелендә Диния нәзарәте һәм «Казан кирмәне» музей-тыюлыгы арасында Кол Шәриф мәчетендә дини эшчәнлекне көйләүгә бәйле килешү имзалана[1]. 2012 елның 3 апрелендә Татарстан мөфтие Илдус Фәиз үзенә Кол Шәриф мәчете имам-хатыйбы вазифаларын йөкләү турында боерык имзалый, ә Сөләйман Зарипов белән Рамил Юныс мәчеттә көндәлек дини хезмәтләр алып баручы имамнар итеп билгеләнә. Әлеге карар мәхәллә халкының бер өлеше арасында ризасызлык тудыра. 5 апрельдә мәчеттә Рамил Юнысны яклап акция уза, анда 400 дән артык кеше катнаша. Нәтиҗәдә Рамил Юныс имам-хатыйб вазифасына кайтарыла[1].

Җинаять эше

2012 елның 19 июлендә Казанда Татарстан мөфтие Илдус Фәиз машинасы шартлатыла, ә ТР Мөселманнар диния нәзарәте уку-укыту бүлеге җитәкчесе Вәлиулла Якупов үтерелә. Бу вакыйгалар буенча «терроризм», «үтерү» һәм «үтерүгә омтылу» маддәләре нигезендә җинаять эше кузгатыла. Рамил Юныс әлеге эштә шаһит буларак катнаша. Әлеге вакыйгалардан соң Рамил Юныс Кол Шәриф мәчетендәге вазифасыннан китә, 20 июльдә «Казан кирмәне» музей-тыюлыгындагы вазифасын да бушата[9].

2012 елның августында Рамил Юныска карата ялган диплом куллану факты буенча җинаять эше кузгатыла[10]. Тикшерү материаллары буенча, ул 2011 елның октябрендә «Казан Кирмәне» музей-тыюлыгының җәмәгатьчелек һәм дини оешмалар белән эшләү буенча директор урынбасары вазифасына урнашу өчен Казан дәүләт аграр университетының икътисад факультеты дипломын куллана. Университетта бирелгән мәгълүматлар буенча, Рамил Юныс студентлар исемлегендә дә, университетны тәмамлаучылар арасында да булмый, диплом да югары уку йорты тарафыннан бирелми[11]. Соңрак ул Россиядән китеп, берникадәр вакыт Лондонда яши. Рәсми чыганакларда әлеге сәфәре тел курсларында укуы белән бәйләп карала. Имам федераль эзләүгә  [рус.] (тат. игълан ителә[12][13].

2018 елдан соң

2018 елның ноябреннән, Мөселманнар диния нәзарәте рәисе Камил Сәмигуллин билгеләве буенча, Казанның Яңа Татар бистәсендәге Иске Таш мәчетенең икенче имамы вазифасын башкара[3][4][5]. Шул ук елда Казан федераль университетында ислам банкингы темасына лекция укый[14].

Иҗаты

Рамил Юныс — вәгазьләр һәм ислам этикасына багышланган китаплар авторы. Аның «Дин һәм тормыш» (рус. Религия и жизнь) циклына кергән «Һәркем Ислам дине белән туа» (2014) хезмәте нәшер ителгән[15]. Вәгазьләре аудио, видео һәм DVD форматларда басыла[6].

Шәхси тормышы

Өйләнгән, ике кыз баласы бар[2].

Искәрмәләр

  1. ↑ 1 2 3 4 5 Переворот в казанском Кремле (рус.). БИЗНЕС Online (4 апрель 2012). Мөрәҗәгать итү датасы: 6 июнь 2026.
  2. ↑ 1 2 3 4 5 6 Колокол для имама Кул Шарифа (рус.). БИЗНЕС Online (24 июнь 2011). Мөрәҗәгать итү датасы: 6 июнь 2026.
  3. ↑ 1 2 3 Вернулись из опалы: Гусман Исхаков и Рамиль Юнусов вновь стали имамами в Казани (рус.). Реальное время (11 декабрь 2018). Мөрәҗәгать итү датасы: 6 июнь 2026.
  4. ↑ 1 2 Рамил Юныс Иске Таш мәчетенә икенче имам итеп билгеләнгән. Безнең гәҗит (11 декабрь 2018). Мөрәҗәгать итү датасы: 6 июнь 2026.
  5. ↑ 1 2 Бывший муфтий Татарстана и экс-имам Кул Шариф вернулись к работе в мечетях в Казани (рус.). Коммерсантъ (12 декабрь 2018). Мөрәҗәгать итү датасы: 6 июнь 2026.
  6. ↑ 1 2 3 4 5 Рамиль хазрат Юнусов (рус.). Татмуфти.ру (7 ноябрь 2011). Мөрәҗәгать итү датасы: 6 июнь 2026. Архивировано 7 ноябрь 2011 года.
  7. ↑ На имама мечети Кул Шариф завели уголовное дело (рус.). Татар Информ (9 август 2012). Мөрәҗәгать итү датасы: 6 июнь 2026.
  8. ↑ 1 2 Обязанности первого заместителя муфтия Татарстана будет исполнять Рамиль Юнусов (рус.). Татар Информ (20 май 2008). Мөрәҗәгать итү датасы: 6 июнь 2026.
  9. ↑ Имам-хатыб мечети «Кул-Шариф» уволился из «Казанского Кремля» (рус.). Аргументы и факты — Казань (23 июль 2012). Мөрәҗәгать итү датасы: 6 июнь 2026.
  10. ↑ Возбуждено уголовное дело в отношении имама мечети Кул Шариф Рамиля Юнусова (рус.). БИЗНЕС Online (9 август 2012). Мөрәҗәгать итү датасы: 6 июнь 2026.
  11. ↑ Силовики запросили в КГАУ диплом Рамиля Юнусова – документ оказался поддельным (рус.). БИЗНЕС Online (9 август 2012). Мөрәҗәгать итү датасы: 6 июнь 2026.
  12. ↑ В Татарстане «не заметили» возвращения имама мечети «Кул Шариф», объявленного в розыск (рус.). ИА REGNUM (16 август 2012). Мөрәҗәгать итү датасы: 6 июнь 2026.
  13. ↑ Беглый имам мечети «Кул Шариф» вернулся в Татарстан для распродажи имущества? (рус.). ИА REGNUM (15 август 2012). Мөрәҗәгать итү датасы: 6 июнь 2026.
  14. ↑ Сбежавший в Лондон бывший имам «Кул Шарифа» прочитал в КФУ лекцию об исламском банкинге (рус.). Реальное время (6 декабрь 2018). Мөрәҗәгать итү датасы: 6 июнь 2026.
  15. ↑ Юныс, Рамил хәзрәт. Һәркем Ислам дине белән туа [Текст / Рамил хәзрәт Юныс вәгазьләре]. — Казан: Акчарлак. — 95 с. — ISBN 978-5-905781-13-1.

Сылтамалар

Тема буенча өстәмә

Төркемнәр