Александр Седов

15 август 1911 елда Шереметьевка авылында (хәзер Татарстанның Түбән Кама районы) крестьян гаиләсендә туа. Балачактан техника белән кызыксына, күршеләренең тегү машиналарын, авыл хуҗалыгы техникасын төзәтә^[1].

Мәктәпне һәм Чистайда слесарьлар курсын тәмамлагач, 1931 елда М. Горький исемендәге Яшел Үзән суднолар төзү заводына эшкә керә һәм анда 1984 елда пенсиягә чыкканчы 52 ел дәвамында эшли^[2]. Слесарьларның яшьләр бригадасын җитәкли, аның әгъзалары 1933 елда район ударниклар слётында продукция сыйфаты, хезмәт җитештерүчәнлеге һәм материалларны сак тоту буенча биремнәрне арттырып үтәгән өчен «Сталинның VI шарты» («VI условий Сталина»)^[3][4] күкрәк билгеләрен алалар.

Бөек Ватан сугышы елларында тылда оборона предприятиесендә эшли. Бронекатерлар һәм артиллерия снарядлары җитештерү белән шөгылләнә, шулай ук фронттан китерелгән корабларны төзәтүдә эшли. Сугыштан соң балык тоту флоты өчен заказлар үти^[1].

Аның исеме күп тапкырлар заводның Мактау китабына, ә 1967 елда Татарстан АССРның Республика Мактау китабына кертелә. Хезмәт ударнигы була, рационализаторлык тәкъдимнәре кертә. Седовның рационализаторлык тәкъдимнәре диңгездә балык тоту судноларында файдаланыла торган «АСМА» балык туңдыру агрегатын реконструкцияләүдә һәм модернизацияләүдә кулланыла^[5].

Яшь белгечләр өчен остаз була — берничә дистә слесарь әзерли.

23 август 1999 елда Яшел Үзәндә вафат була.

• Социалистик Хезмәт Герое (1966 ел) — 1959–1965 еллардагы планны үтәүдәге зур уңышлары һәм яңа техника үрнәкләрен ясаган өчен Ленин ордены һәм «Урак һәм Чүкеч» медале белән бирелә^[6];
• башка медальләр.