Гүзәл Гарәпшина

Гүзәл Гарәпшина 1966 елның 6 мартында Татарстан АССРның Актаныш районы Яңа Җияш авылында туа^[2].

Үз авылларында мәктәп булмагач, өч чакрым ераклыктагы Яңа Богады авылына йөреп укый. Кичләрен мәктәптәге бию түгәрәгенә йөри. Сигезенче сыйныфны тәмамлагач, газетада Казан театр училищесына чакыру турындагы белдерүне күреп, имтиханнар тапшыра һәм уку йортына кабул ителә^[3].

1981—1985 елларда Казан театр училищесында Мәсгут Имашев төркемендә укый. Укытучылары арасында Шамил Бариев, Рабит Батулла, Фирдәвес Әхтәмова, Асия Хәйруллина була^[3].

1985 елда театр училищесын тәмамлагач, Кәрим Тинчурин театры режиссёры Равил Тумашев чакыруы буенча Кәрим Тинчурин исемендәге Татар дәүләт драма һәм комедия театрына эшкә килә. Театрдагы беренче роле — «Хаҗи әфәнде өйләнә» спектаклендәге Камилә роле^[3]

2005 елда Казан дәүләт мәдәният һәм сәнгать университетын тәмамлый^[2] (хәзерге вакытта Казан дәүләт мәдәният институты).

Г. М. Гарәпшина иҗатында төрле пландагы рольләр — сабыр Миңлекәйдән алып шаян Халидәгә, явыз Фәрхигә кадәр — үз урынын алган. Соңгы елларда театрда өлкән яшьтәге хатын-кызлар (карчыклар) рольләрен күбрәк башкара^[4].

Актриса илледән артык роль башкарган, алар арасында:

• Камилә — «Хаҗи әфәнде өйләнә» (Ш. Камал);
• Зөбәрҗәт — «Танышулар-кавышулар» (Д. Салихов);
• Хезмәтче — «Бернарда Альба йорты» (Ф. Г. Лорка);
• Миңлекәй — «Айгөл иле» (М. Кәрим);
• Бибиҗамал — «Кияүләр» (Х. Вахит);
• Маһруза — «Төн яна учакта» (Х. Ибраһимов);
• Фәрхи — «Сүнгән йолдызлар» (К. Тинчурин);
• Җиһан — «Назлы кияү» (К. Тинчурин);
• Аптекачы — «Без барыбыз да кешеләр» (Э. М. Ремарк буенча);
• Халидә — «Эх, алмагачлары!» (Ш. Фәрхетдинов);
• Рәйсә Рәисовна — «Ай, былбылым!»(Ш. Фәрхетдинов);
• Мәйсәрә — «Яратам! Бетте-китте!» (Л. Әминова);
• Дәү әни — «Ядәч! Исемдә!» (А. Бик-Булатов, М. Гафурова, Э. Дусаева, Й. Миңнуллина);
• Әкълимә — «Син бит минем бергенәм» (И. Юзеев);
• Диләрә — «Шәкүр карак» (М. Гыйләҗев).

• Татарстанның атказанган артисты (2003);
• Татарстан Республикасы Мәдәният министрлыгының «Мәдәният өлкәсендәге казанышлары өчен» күкрәк билгесе (2016);
• Татарстан Республикасының «Фидакарь хезмәте өчен» медале (2023)^[5].

Гастрольләрнең берсендә күчмә театр (хәзерге К. Тинчурин исемендәге театр) шофёры Мәсгут Гарәпшин белән таныша, кияүгә чыга. Уллары бар^[3].

2016 елның 20 апрелендә Кәрим Тинчурин исемендәге театрда актрисаның 50 еллык юбилее уңаеннан Х. Вахит әсәре буенча куелган «Кияүләр» спектакле бенефис форматында уза. Бу кичәдә Гүзәл Гарәпшина Бибиҗамал ролен башкара^[6].

2021 елның 6 мартында К. Тинчурин театрында Гүзә Гарәпшинаны 55 яшьлеге белән котлау тантанасы уза^[7][8].