Зилә Вәлиева
Зилә Рәхимҗан кызы Вәлиева — Татарстан сәясәтчесе, мәдәният эшлеклесе. Татарстан Республикасы Иҗтимагый палатасы рәисе (2020 елдан)[1].
Тәрҗемәи хәле
Вәлиева Зилә Рәхимҗан кызы 1952 елның 15 октябрендә Уфа шәһәрендә туа.
Мәскәү дәүләт университетының журналистика факультетын тәмамлый (1978 ел). 1970—1980 еллар — Уфа шәһәре «Ленинчы» республика яшьләр газетында мөхбир, әдәбият һәм сәнгать бүлеге мөдире. 1980—1982 еллар — Казан шәһәре «Вечерняя Казань» газеты мөхбире. 1982—1990 еллар — Казан шәһәре «Советская Татария» газетында мөхбир, социаль мәсьәләләр бүлеге мөдире. Казан шәһәре «Известия Татарстана» газетында сәясәт бүлеге редакторы.
1992—1995 еллар — Татарстан Республикасы Югары Советы рәисенең беренче урынбасары.
1995—1999 еллар — Татарстан Республикасы Дәүләт Советы рәисе урынбасары.
1999 елның сентябре — 2001 елның апреле — Татарстан Республикасының Матбугат, телерадиотапшырулар һәм массакүләм коммуникация чаралары министры.
2001 елның мае — 2005 елның апреле — Татарстан Республикасы Премьер-министры урынбасары.
2005 елның 29 апреленнән Татарстан Республикасы Премьер-министры урынбасары — мәдәният министры.
2012 елның 17 маеннан «Казан кирмәне» музей-тыюлыгы директоры.
2020 елның 16 гыйнварында алтынчы чакырылыш Татарстан Иҗтимагый палатасының беренче утырышында Татарстан Иҗтимагый палатасы рәисе итеп сайлана[2].
2023 елның 20 гыйнварында җиденче чакырылыш Татарстан Иҗтимагый палатасының беренче утырышында янәдән Татарстан Иҗтимагый палатасы рәисе итеп сайлана[3].
Бүләкләре
- «Фидакарь хезмәт өчен» медале.
- 2003 ― «Санкт-Петербургның 300 еллыгы истәлегенә» медале.
- 2005 ― «Казанның 1000 еллыгы истәлегенә» медале.
- 2007 ― Татарстан Республикасы Президентының Рәхмәт хаты.
- 2008 ― «Дуслык» ордены (РФ).
- 2009 ― Россия Федерациясе Хөкүмәтенең мәдәният өлкәсендәге премиясе лауреаты.
- 2017 ― «Дуслык» ордены (Татарстан) — «республиканың тарихи-мәдәни һәм рухи мирасын саклауга, үстерүгә, популярлаштыруга керткән өлеше һәм озак еллар башкарган тырыш хезмәте өчен»[4].
- 2022 ― «Татарстан Республикасы алдындагы казанышлар өчен» ордены ― «Татарстан Республикасы файдасына күпьеллык нәтиҗәле хезмәте һәм актив җәмәгать эшчәнлеге өчен»[5].
- Рабига Кушаева исемендәге «Хатын-кыз — милләт анасы» медале (2022)[6].
- «Татарстан Республикасы алдындагы казанышлары өчен» орден медале — республиканың социаль-икътисадый үсешенә аерым өлеш кертүе, күпьеллык нәтиҗәле хезмәте өчен[7].
Гаилә хәле
Кияүдә (ире Римзил Вәли), улы Динислам (Денис).
Искәрмәләр
- ↑ Председатель Общественной палаты Республики Татарстан (рус.). Общественная палата Республики Татарстан. Мөрәҗәгать итү датасы: 9 октябрь 2025.
- ↑ Надежда Гордеева. Зилә Вәлиева Татарстан Иҗтимагый палатасының яңа рәисе итеп сайланды. Татар-информ МА, 16.01.2020
- ↑ Надежда Гордеева. Председателем Общественной палаты Татарстана вновь стала Зиля Валеева. Татар-информ, 20.01.2023
- ↑ «Сөембикә», 2017 ел, ноябрь саны, 19нчы бит
- ↑ Зилә Вәлиева «Татарстан Республикасы алдындагы казанышлары өчен» ордены белән бүләкләнде. Татар-информ, 17.10.2022
- ↑ Председателя региональной общественной организации Республики Татарстан «Женщины Татарстана» Валееву Зилю Рахимьяновну наградили высшей наградой (рус.). vk.com. Мөрәҗәгать итү датасы: 9 октябрь 2025.
- ↑ О награждении медалью ордена «За заслуги перед Республикой Татарстан» (рус.). rais.tatarstan.ru (21 гыйнвар 2026). Мөрәҗәгать итү датасы: 4 август 2026.