Касыйм Ситдыйков

1913 елның 17 гыйнварында Казан губернасы Чистай өязе (хәзерге Чистай районы) Мөслим авылында туган. Туган авылында 8 классны, Чистай педагогия техникумын тәмамлаган. Шыкмай авылында тулы булмаган урта мәктәптә укытучы, уку-укыту бүлеге мөдире, директор булып эшәгән. 1933-1937 елларда Кызыл Армиядә хезмәт иткән. 1939 елда яңадан армиягә чакырылып, командирлар составын камилләштерү курсларын тәмамлаган.

1941 елның июненнән Бөек Ватан сугышы фронтларында (Көнбатыш фронт, Көньяк-көнбатыш фронт, 2нче һәм 3нче Украина фронтлары). 3нче Украина фронты 27нче армия 78нче укчы дивизия 458нче укчы полкның 2нче укчы батальоны өлкән адъютанты була. Молдова, Румыния җирләрендә сугышларда катнаша. 1944 елның мартында беренче тапкыр Советлар Союзы Герое исеменә тәкъдим ителә. 1945 елның 13 мартында Маҗарстанның Тюкреш хуторы янында танклар һәм җәяүле дошман контрһөҗүмен кире кайтарганда, рота командирын алмаштыра. Рота уксибәр уты белән дошманны җиргә ятарга мәҗбүр итә. Боҗраны бәреп кергән 3 дошман танкының 2 сен капитан Ситдыйков үзе яндыргыч сыекча шешәсе белән яндыра. Әлеге сугышта һәлак була. 1945 елның 29 июнендә (вафатыннан соң) Советлар Союзы Герое исеме бирелә – Маҗарстанда Балатон саклану операциясе вакытында шәхси батырлык һәм каһарманлык күрсәтүе, хәрби округ белән оста җитәкчелек итүе өчен.

• 1945 Советлар Союзы Герое
• 1945 «Алтын йолдыз» медале
• 1945 Ленин ордены
• 1943 Кызыл Йолдыз ордены
• 1944 Кызыл Байрак ордены
• 1944 I дәрәҗә Ватан сугышы ордены

• Чистай шәһәрендә урамга исеме бирелгән.
• Мөслим авылында бюст урнаштырылган.
• Чистай шәһәрендә каһарманнар аллеясында стела куелган.
• 1965 Мөслим авылы урта хезмәт политехника мәктәбенә исеме бирелгән^[1]