Илгиз Закиров

1954 елның 7 июлендә Актаныш районы Аеш авылында туган^[1]. 1978 елда Әлмәт музыка укуханәсен (2007 елдан көллият) тәмамлагач, Яр Чаллыга күчеп килә һәм КамАЗ берләшмәсенең профкомы каршындагы эстрада кружогы җитәкчесе буларак иҗади эшчәнлеген башлый^[1].

1980 елда Яр Чаллының «Энергетик» мәдәният сараена эшкә күчә^[1]. Иҗат юлының башында «Чулпан» татар вокаль ансамблен оештыра^[1]. Бу коллектив шәһәр, зона һәм республика фестивальләрендә катнашып, төрле дәрәҗәдәге дипломнар белән бүләкләнә, «Наврүз», «Сабантуй», «Яңа ел», «Шәһәр көне» кебек чараларда даими чыгыш ясый^[1].

1990 елда Казан дәүләт педагогия институтының музыка факультетын тәмамлый^[1].

Хәния Фәрхи җитәкчелегендәге «Бәйрәм» ансамблендә музыкаль җитәкче булып эшли^[2].

2023 елның маенда Илгиз Закиров йөрәгенә катлаулы операция кичерә^[3].

2024 елның июлендә композитор үзенә 70 яшь тулу юбилеен билгеләп үтә^[4].

Татар һәм башкорт шагыйрьләре белән хезмәттәшлек итеп, йөзләрчә җыр язган^[1]. Аның әсәрләре радио-телевидениедә даими трансляцияләнә.

Газинур Фарукшин белән «Кәркәле таулары», «Актанышым», «Сиңа кайттым, газиз туган җирем» кебек җырлар иҗат итә^[2]. Салават Фәтхетдинов аның белән 1991 елда Чаллыга күчеп килгәч хезмәттәшлек итә башлый; Роберт Миңнуллин шигыренә язылган «Әнкәйнең догалары» җыры Салават башкаруында «Уятмакчы булсаң халык күңелләрен» телевизион конкурсында беренче урынны яулый^[2].

2023 елда «Яңа татар җыры» конкурсында Рафис Күрбан сүзләренә язылган «Бетмибез» җыры (Рустам Насыйбуллин башкаруында) 1 нче урынны яулый^[5].

Танылган җырлары арасында: «Кышкы чия» (Виннисә Фәттахова сүзләре), «Кәркәле таулары», «Соңдыр шул, соңдыр», «Ап-ак карлар ява» (Гөлшат Зәйнашева сүзләре), «Илле яшь», «Бу дөньяда без кунак кына», «Саубуллашу» (Шәрига Таһирова сүзләре), «Туган якның китмәс кошлары без» (Марсель Гыймазетдинов сүзләре) бар^[2].

Баянчы-аккомпаниатор буларак, Хәния Фәрхи, Азат Тимершәех һ. б. җырчылар белән эшләде. Аның җырларын Гүзәл Уразова, Руслан Кираметдинов, Илсөяр Зарипова кебек башкаручылар репертуарына алган^[6].

Минзәлә театры һәм Чаллы татар театры спектакльләренә музыка язды^[1]. Татарстан һәм Башкортстан шәһәрләрендә соло концертлар белән чыгыш ясый.

• 1993 — Татарстанның атказанган сәнгать эшлеклесе^[1];
• 2014 — Чаллы шәһәре алдындагы хезмәтләре өчен аерымлык билгесе^[1];
• Яр Чаллы шәһәре мэрының Рәхмәт хатлары^[1].

• Тормыш иптәше — Сания Маликовна Закирова, 40 елдан артык бергә яшиләр^[4].
• Кызы — Гөлназ Илгиз кызы Закирова, композитор, Казан дәүләт консерваториясен тәмамлаган^[7].
• Улы — Илнар Илгиз улы Закиров, экономист^[1].