Рус телендәге версияПартнёрлык проектларыМахсус проектлар
Телне алыштыру
РУВИКИ ТУРЫНДА

Хозур ТВ

Хозур ТВ (рус. Хузур ТВ) — Татарстан Республикасы мөселманнарының диния нәзарәте тарафыннан булдырылган мөселман телеканалы. Телеканал рус һәм татар телләрендә тәүлек буе эшли, кабель челтәрләрендә һәм интернет аша күрсәтелә[1].

Телеканал үзенең төп максаты — дини-мәгърифәтчелек эшен алып бару, рухи-әхлакый кыйммәтләрне популярлаштыру һәм радикаль карашлардан чит булган мәгълүмати мәйдан булдыру[2][3].

Тарихы

«Хозур ТВ»ның сынау режимындагы эше 2018 елның 1 мартында Татарстан территориясендә «Таттелеком» ПАО IPTV челтәрләрендә башлана[4]. 2018 елның мартында Татарстан матбугатында телеканалның мөселман каналы буларак эшли башлавы хәбәр ителә. Ул вакытта татар һәм рус телләрендәге тапшыруларны якынча тигез күләмдә күрсәтү планлаштырыла[2].

2019 елның июленнән «Хозур ТВ» тапшырулары «Ростелеком» цифрлы телевидениесе клиентлары өчен Татарстан территориясендә 755 нче каналда күрсәтелә башлый[5].

Телеканалны булдыру вакытында массакүләм матбугат чарасы буларак теркәү таныклыгы рәсмиләштерелүе һәм тапшырулар алып бару өчен универсаль лицензия алынуы турында хәбәр ителә[4].

Телетапшырулар географиясе

2024 елның апрелендә телеканалның кабель челтәрләрендә Россиянең 13 төбәгендә күрсәтелүе хәбәр ителә: Татарстан, Башкортстан, Мәскәү өлкәсе, Севастополь, Дагыстан, Чуаш Республикасы, Түбән Новгород өлкәсе, Тында шәһәре (Амур өлкәсе), Волгоград өлкәсе, Пенза өлкәсе, шулай ук Оренбург, Саратов һәм Самара өлкәләре. Бу киңәю «Хозур» нәшрият йорты һәм «Ростелеком» ПАО арасында төзелгән килешү нигезендә алып барыла[3].

2024 елда телеканал тагын алты төбәккә һәм территориягә чыга: Амур өлкәсе, Саратов өлкәсе, Оренбург өлкәсе, Самара өлкәсе, Воронеж шәһәре һәм Удмуртия Республикасы. 2024 ел ахырына кабель һәм IP-челтәрләр аша «Хозур ТВ»ны карау мөмкинлеге булган гаиләләр саны 2 миллионга җитүе хәбәр ителә[6].

2026 елның гыйнварында «Хозур ТВ» Дагыстан территориясендә «Дагсвязь-Телеком» кабель операторы платформасында күрсәтелә башлый. Шул хәбәрдә телеканалның Россиянең 15 төбәгендәге кабель челтәрләрендә, шул исәптән Мәскәүдә һәм Кырымда, күрсәтелүе, шулай ук интернет аша дөньяның теләсә кайсы ноктасында карау мөмкинлеге булуы әйтелә[7].

Эчтәлек һәм тапшырулар

Телеканал тапшырулары мәгърифәтчелек һәм белем бирү юнәлешенә карый. Дини темалардан тыш, программа челтәрендә гаилә, тәрбия, тарих, ислам мәдәнияте, гореф-гадәтләр, фәнни-популяр темалар һәм балалар өчен тапшырулар урын ала[3].

2024 елда телеканал редакциясе ай саен 25–40 сәгать күләмендә яңа телевизион тапшырулар әзерләве турында хәбәр ителә. Бу тапшырулар традицион ислам тарихына, дини кануннарга, гыйбадәт тәртипләренә, гореф-гадәтләргә һәм экстремизмны булдырмау мәсьәләләренә багышлана[6].

Рәсми сайтында телеканал тапшырулары берничә юнәлешкә бүленә: белем бирү тапшырулары, дин әһелләре белән әңгәмәләр, балалар тапшырулары һәм фәнни-популяр тапшырулар[8].

Телеканалның рәсми сайтында күрсәтелгән тапшырулар арасында «Гаилә дәресләре», «Мәслихәт», «Дин турында», «Имамнан сорыйк», «Татарская география», «История ислама в России», «Хикмәтле хикәяләр», «1001 хәзинә», «Балам багалмам», «Золотой век Исламской цивилизации», «Ислам сегодня» һәм башка проектлар бар[8].

Аудиториясе һәм онлайн-платформалар

2024 елда «Хозур ТВ»ның рәсми YouTube-каналында язылучылар саны 1,24 миллионга җитүе, ә YouTube сервисындагы контентны карауларның гомуми саны 210 миллионнан артуы хәбәр ителә.[6].

Телеканалны кабель телевидениесе аша, huzurtv.ru сайтында, шулай ук App Store һәм Google Play аша йөкләнә торган мобиль кушымтада карау мөмкинлеге бар. 2024 ел нәтиҗәләре буенча рәсми сайттагы уникаль кулланучылар саны елына 2 миллионга җитүе хәбәр ителә[6].

2024 ел нәтиҗәләре буенча «Хозур ТВ» limehd.tv онлайн-агрегаторында төбәк телеканаллары арасында 25леккә кертелгән[6].

Хезмәттәшлек

Телеканал Татарстан Республикасы мөселманнарының Диния нәзарәте белән бәйле медиапроектлар системасына керә. Шулай ук ДУМ РТ хәбәрләрендә телеканалның Төркия, Иран, Дагыстан, Чечня һәм башка төбәкләрнең телерадиокомпанияләре контенты белән эшләве турында әйтелә[3].

Искәрмәләр

  1. ↑ В Дагестане запустили вещание мусульманского телеканала «Хузур ТВ» (рус.). IslamNews (31 гыйнвар 2026). Мөрәҗәгать итү датасы: 17 июнь 2026.
  2. ↑ 1 2 Татар мөселман телеканалы эшли башлады. Мәгариф (14 март 2018). Мөрәҗәгать итү датасы: 17 июнь 2026.
  3. ↑ 1 2 3 4 Телеканал «Хузур ТВ» расширяет географию своего вещания в России (рус.). Духовное управление мусульман Республики Татарстан (24 апрель 2024). Мөрәҗәгать итү датасы: 17 июнь 2026.
  4. ↑ 1 2 Нравственность, патриотизм и дружба народов: что ждет зрителей канала «Хузур ТВ»? (рус.). Islam Today (13 март 2018). Мөрәҗәгать итү датасы: 17 июнь 2026.
  5. ↑ «Хузур ТВ» теперь доступен для клиентов телевидения «Ростелеком» (рус.). Духовное управление мусульман Республики Татарстан (30 июль 2019). Мөрәҗәгать итү датасы: 17 июнь 2026.
  6. ↑ 1 2 3 4 5 “Хозур ТВ”ны Россиянең 14 төбәгендә 2 миллион гаилә карый! Татарстан Республикасы мөселманнарының Диния нәзарәте (22 гыйнвар 2025). Мөрәҗәгать итү датасы: 17 июнь 2026.
  7. ↑ В Дагестане запустили вещание мусульманского телеканала «Хузур ТВ» (рус.). IslamNews (31 гыйнвар 2026). Мөрәҗәгать итү датасы: 17 июнь 2026.
  8. ↑ 1 2 Все передачи Хузур ТВ (рус.). Хузур ТВ. Мөрәҗәгать итү датасы: 17 июнь 2026.

Сылтамалар

Тема буенча өстәмә

Төркемнәр