Әлфизә Гыйниятуллина

1936 елның 17 октябрендә БАССРның Яңавыл районы Ямады авылында туган^[1]. Милләте — башкорт. Ямады урта мәктәбен тәмамлый^[2].

Хезмәт юлын 1954 елның августында Ямады урта мәктәбендә лаборант булып башлый^[2]. 1955 елның сентябреннән — Пермь өлкәсенең «Коспашуголь» тресты 24-38нче шахтасында транспортёр машинисты, 1957 елның июненнән — Свердловск өлкәсенең Түбән Тагил шәһәрендәге Урал вагоннар заводында стержень ясаучы булып эшли^[1].

1964 елның июленнән — «Башнефть» җитештерү берләшмәсенең «Краснохолмскнефть» нефть-газ чыгару идарәсе, 3 нефть промыселында нефть һәм газ чыгару буенча оператор^[2]. Башта унга якын скважинага хезмәт күрсәтә, акрынлап аларның саны арта һәм пенсиягә чыгар алдыннан 30 дан артып китә^[3].

Унынчы бишьеллык елларында (1976–1980) Әлфизә Муллахмәт кызы эшләгән бригада, 14 000 тонна нефтьне планнан тыш чыгарырга дигән йөкләмә алып, чынлыкта 14 150 тонна нефть чыгара^[3]. Бригада 1981 елда да уңышлы эшләп, планнан тыш 3500 тонна нефть чыгаруга ирешә^[3]. 1982 елның беренче кварталында, 800 тонналык йөкләмә алып, 900 тонна итеп арттырып үти^[3].

Нефть чыгару процессында алдынгы технологияләрне беренчеләрдән булып куллана башлый, аерым алганда, нефть промыселы җиһазларында парафин һәм минераль тозлар утырмаларына каршы көрәшү өчен скважиналарга төрле химик реагентлар белән эшкәртүне кертә^[3]. Яңа техника һәм технологияләрне җитештерүгә кертүдә актив катнаша. Унынчы бишьеллык чорында һәм унберенче бишьеллыкның (1981–1985) беренче елында 7 рационализаторлык тәкъдиме ясый һәм кулланышка кертә^[3].

Күренекле җитештерү казанышлары, унынчы бишьеллык планнарын һәм социалистик йөкләмәләрне вакытыннан алда үтәгәне һәм хезмәт батырлыгы күрсәткәне өчен, СССР Югары Советы Президиумының 1982 елның 2 июлендәге Указы белән Әлфизә Муллахмәт кызы Гыйниятуллинага Ленин ордены һәм «Урак һәм Чүкеч» алтын медале тапшырыла, Социалистик Хезмәт Герое исеме бирелә^[4].

КПССның XXVII съездына (1986) делегат булып сайлана^[3].

1987 елда пенсиягә чыга. Башкортостанның Яңавыл районы, Ямады авылында яши.

2019 елның 22 декабрендә вафат була, авыл зиратында җирләнгән^[5][3].

• Ямады авылындагы урам аның исемен йөртә^[6];
• Яңавыл районында ел саен Социалистик Хезмәт Герое Әлфизә Гыйниятуллина кубогына мини-футбол буенча турнир үткәрелә^[7].

• Социалистик Хезмәт Герое (1982 елның 2 июле);
• Ленин ордены (1982 елның 2 июле);
• Октябрь Инкыйлабы ордены (1977);
• «Хөрмәт Билгесе» ордены (1971);
• «Владимир Ильич Ленинның тууына 100 ел тулу уңаеннан» медале;
• БАССРның атказанган нефтьчесе (1986);
• башка медальләр.