Фәнис Җиһанша

1972 елның 1 июлендә Әтнә районының Күәм авылында туа. Сигезьеллык мәктәпне тәмамлагач, 1986–1990 елларда Арча педагогия көллиятендә укый, ә 1989–1990 елларда балалар укыта. 1990–1995 елларда — Казан сәнгать һәм мәдәният институты студенты (укытучылары: СССРның халык артисты Марсель Сәлимҗанов, Россиянең атказанган сәнгать эшлеклесе Фәрит Бикчәнтәев). Институтны тәмамлагач, Галиәсгар Камал исемендәге Татар дәүләт академия театры труппасына эшкә килә^[3].

Студент чагыннан Камал театры спектакльләрендә катнаша, 1994 елда «Су анасы» фильмында төшә.

Фәнис Җиһанша — драматик артист, уйнаган образының эчке психологик кичерешләрен тирәнлек белән тамашачыга җиткерә. Образларына эчке йомшаклык хас^[4]. Камал театрындагы беренче рольләре — Сукыр патша («Сукыр патша» спектакле), Тригорин — («Акчарлак»), Освальд («Өрәкләр»), Гурман («Урланган мәхәббәт»). «Гаугалы гаилә»дәге Рокко, «Тартюф»тагы Тартюф, «Яра»дагы Габдулла рольләре артистка танылу, тамашачы мәхәббәтен алып килә^[5].

Театрдан тыш Фәнис Җиһанша 1999 елдан башлап фильмнарны татарчага тәрҗемә итү эшендә катнаша, ТНВ каналында балалар өчен тапшыру алып бара, классик татар шагыйрьләре шигырьләрен яздыра, рекламада төшә. Татарстан киносында иң күп төшүче актер^[6]. Шулай ук ораторлык һәм актерлык осталыгы буенча осталык дәресләре уздыра^[7].

2023 елның 3 маенда Камал театрында актерның юбилей кичәсе уза. Программада хезмәттәшләренең һәм дусларының котлаулары, шулай ук «Көзге кайтаваз» премьерасы тәкъдим ителә. Төп рольне Фәнис Җиһанша башкара^[8][9].

Түбәндәге фильмнарда уйный^[11]:

• «Любовь моя», сериал, комедия (Россия, 2005);
• «Гастарбайтер», кыска фильмы (Россия, 2014);
• «Юха», фильм (Россия, 2016);
• «Татарометражки» мелодрама, гаилә фильмы (Россия, 2017);
• «Тапшырылмаган хатлар», драма (Россия, 2017);
• «Водяная», фэнтези (Россия, 2018);
• «Кире», комедия (Россия, 2019);
• «Көтелмәгән кунак», фильм (Россия, 2019);
• «Нулевые», кыска фильм (Россия, 2020);
• «Кахексия», драма, триллер (Россия, 2022).

• 2003 — «Икенче пландагы иң яхшы ир-ат роле» номинациясендә театр премиясе — М. Таруханның «Легенда о девушке Арзы» пьесасы буенча куелган «Арзы кыз» спектаклендә Биктимер роле өчен;
• 2007 — «Мәдәнияттәге казанышлары өчен» Мәдәният министрлыгы күкрәк тамгасы;
• 2012 — Татарстан Республикасының атказанган артисты — театр сәнгатен үстерүгә зур өлеш керткән өчен;
• 2016 — Муса Җәлил истәлек медале^[12];
• 2019 — Марсель Сәлимҗанов премиясе — Татарстан Республикасының һөнәри театр сәнгатен үстерүгә зур өлеш керткәне өчен;
• 2023 — Татарстанның халык артисты^[13];
• 2024 — «Татар сүзе» халыкара сәнгатьле сүз телевизион бәйгесендә «Профессионаллар» номинациясе җиңүчесе^[14].

Гаиләле, дүрт бала әтисе: уллары — Габулла белән Газизулла, кызлары — Рәйхан белән Айгөл. Гаиләсе белән Казанда яши^[15].