Илшат Фәрдиев

1960 елның 31 августында Татарстанның Актаныш районы Әнәк авылында туган.

1983 елда «Шәһәр һәм авыл хуҗалыгы сәнәгать предприятиеләрен электр белән тәэмин итү» белгечлеге буенча Мәскәү энергетика институтының Казан филиалын тәмамлый.

1983—1985 елларда «Тукай» кошчылык фабрикасында электромонтер һәм өлкән инженер булып эшли.

1985—1990 елларда тимер-бетон эшләнмәләр заводының баш энергетигы була.

1990—1995 елларда — Татарстан авыл хуҗалыгы һәм азык-төлек министрлыгының механикалаштырылган колонна башлыгы.

1995—1997 елларда Нур Баян исемендәге Татарстан Республикасы Актаныш районы авыл хуҗалыгы кооперативлары берләшмәсе рәисе була. 1997—1998 елларда — Актаныш районы администрациясе башлыгы, 1998—1999 елларда — Әлмәт районы һәм Әлмәт шәһәре администрациясе башлыгы.

1999—2010 елларда "Татэнерго"ның генераль директоры була. 2010—2012 елларда — Татарстан Республикасы премьер − министры урынбасары — энергетика министры.

2012 елның маеннан Илшат Фәрдиев — «Сетевая компания» ААҖ генераль директоры.

«Агросила Холдинг» АҖ Директорлар советы рәисе.

Шулай ук җәмәгать эшчәнлеге белән шөгыльләнә — Татарстан Республикасы Дәүләт Советының икенче (2000—2004), өченче (2004—2009) һәм дүртенче чакырылыш (2009—2010) депутаты була.

• «Дуслык» ордены (2025) — Татарстан Республикасының ягулык-энергетика комплексын үстерүгә керткән өлеше, күпьеллык нәтиҗәле хезмәте һәм актив җәмәгать эшчәнлеге өчен^[1];
• «Яшел Үзән муниципаль районы алдындагы казанышлары өчен» медале (2024);
• Дуслык ордены (РФ) ― күпьеллык намуслы хезмәте өчен (2021)^[2][3];
• Хөрмәт ордены (2007)^[4];
• «Казанның 1000 еллыгы истәлегенә» медале (2005);
• Татарстан Республикасының атказанган энергетигы (2004)^[5];
• Фән һәм техника өлкәсендә Татарстан Республикасы Дәүләт премиясе лауреаты (2003);
• 2007 елда иң югары мөселман бүләге — «Әл-Фәхр» ордены белән бүләкләнә
• Татарстан Республикасы Президентының Рәхмәт хаты (2006);
• Татарстан Республикасы Мактау кәгазе (2002);
• Шулай ук «Дөнья тәҗрибәсе һәм Россия икътисады» халыкара форумының мактаулы билгесе;
• «Ел менеджеры-2001» Россия конкурсы һәм «Ел җитәкчесе» республика конкурсында җиңүче (2001, 2004);
• «Россия икътисады лидеры — 2003» исеме^[6].

Гаиләле, өч бала әтисе^[7]. Тормыш иптәше Диләрә, чыгышы белән Үзбәкстаннан, ике кызы бар.

Төпчек кызы Алсу (1991―2021) ― эшмәкәр: «Чаллы-бройлер» ҖЧҖ, «Рубаи» ҖЧҖ, «Нигез» ҖЧҖ һәм «Түбән Кама агрофирмасы» ҖЧҖ хуҗаларыннан берсе, Зәй шикәре ҖЧҖ Директорлар советы әгъзасы. 2021 елның 6 июлендә Мәскәүнең Мосфильм урамында юл кичүен электр самокатында хәрәкәтне тыя торган кызыл утка чыгып барганда югары тизлектә килгән номерсыз БМВ машинасы (йөртүчесе 19 яшьлек Хренов фамилияле Башкортстан кешесе булып чыга) астына керә, алынган травмалардан һәлак була^[8].

Тагын бер кызы — Алинә Фәрдиева, аерылган (тормыш иптәше — «Зәй шикәре» АҖнең элеккеге генераль директоры Шамил Минһаҗев)^[9].