Ленар Миңнемуллин

1988 елның 20 апрелендә Кукмара районы Вахит авылында туган. Әтисе Газинур, әнисе Халисә. 2005—2009 елларда Казан театр укуханәсендә актер белгечлеге ала (Раушан Шәрәф, Ришат Хаҗиәхмәтов курсы). Читтән торып Казан дәүләт мәдәният институтынының театр һәм кино бүлегендә укый.

2009 елдан 2015 елга кадәр Сабир Өметбаев исемендәге Минзәлә татар дәүләт драма театры артисты.

2015—2018 елларда «Мебелев» мебель цехында эшли.

2018 елның апреленнән 2019 елның 31 гыйнварына кадәр Минзәлә мәдәният сарае директоры^[1]

Студент елларында Казан татар яшь тамашачы театры спектакльләрендә катнаша. Минзәлә театрында уйнаган рольләре:

• Зиннәт — «Җырланмаган җыр» Аманулла
• Әмир — «Мулла» Туфан Миңнуллин
• Керпе Сәлим — «Мөһаҗирләр» Мәхмүт Галәү
• Мифтах — «Сөннәтче бабай» Гаяз Исхакый
• Искәндәр — «Бер картлыкта, бер яшьлектә» Әхәт Гаффар
• Егет — «Ташкын» Түнҗәр Җүҗеноглу һ. б.

Тугызынчы сыйныфта укыганда мәктәптә узган концертларда җырлый башлаган. Мәктәпне тәмамлагач, Казан музыка укуханәсенә укырга керергә уйлаган егеткә җырчы Мингол Галиев театр укуханәсендә укырга киңәш биргән. Ленар Миңнемуллин җырдан аерылмый, хатыны белән артистлар төркеме туплап, туган көн, юбилейлар, туй, никах мәҗлесләрен, Сабан туе һ. б. бәйрәмнәрне алып бара.

• 2013 — Дамир Сираҗиев премиясе
• Әлфия Авзалова исемендәге премия
• 2015 — «Тантана» премиясе — «Шомбай» (К. Мәргән) спектаклендәге Маматай роле өчен^[2].

Хатыны Илсинә Илшат кызы Миңнемуллина (19.06.1987), 2007 елдан Минзәлә театры актрисасы. Балалары: кызы Әдилә, улы Әмир.

Кечкенәдән ат чабышы белән мавыга. Әтиләре Газинур өч улына да юртак атлар алып биргән. Минзәлә театрында эшли башлагач та, ат чабышларын калдырмый, шәһәр-авыл Сабантуйларында катнашып, җиңүче була. Минзәлә ипподромында балаларга ат чабышы серләрен өйрәтә. Юртаклар үрчетү белән шөгыльләнә^[3].