Подберезье районы

Яңа Подберезье районы территориясе 1920 елга кадәр Казан губернасының Зөя өязе Өлҗән волостенда, 1920 елдан 1927 елга кадәр Зөя кантоны Өлҗән волостенда, 1927 елдан 1944 елга кадәр Кайбыч районында урнашкан була.

1944 елның 19 февралендә Кайбыч районыннан бүлеп чыгару юлы белән оештырыла^[3]. Район составына Олы Подберезье, Кече Подберезье, Турма һәм Каргалы (1954 елда кыскартыла, Каргалы авылы Олы Подберезье авыл советына күчерелә) авыл советлары керә^[4].

Оештыру эшләре 1944 елның август аена кадәр дәвам итә. Олы Подберезье авылында яңа административ биналар төзү, эшче кадрлар һәм техник кораллар белән тәэмин итү Кайбыч районына йөкләнә.

1952 елның 8 маенда район Татарстан АССРның Казан өлкәсе составына керә. 1953 елның 30 апреленнән, өлкәләр бетерелүгә бәйле рәвештә, ТАССР карамагында була.

Район 1956 елның 14 маенда юкка чыгарыла, территориясе Кайбыч районына тапшырыла^[2].

Район 1948 елның 1 гыйнварына 16 авыл советыннан (Аюкөйдергән, Бакырчы, Олы Подберезье, Зур Тәрбит, Каргалы, Корноухово, Кече Подберезье, Мәлки, Надеждино, Иске Буа, Иске Тәрбит, Торым, Өлҗән, Хуҗа Хәсән, Чирмешән, Чүти)^[5], 37 торак пункттан тора. Район мәйданы 524 км² тәшкил итә^[2].

Районның беренче секретарьлары — В. А. Чванов , П. И. Захаров, Ф. Е. Чванов.

Районда «Авангард» газетасы оештырыла, биредә Сорнаева, Яковлев, Журавлев фамилияле мөхәррирләр эшли.

Районда 13 күмәк хуҗалык эшли^[5]:

• «Авангард» — Олы Подберезье авыл советы;
• «Кызыл Герой» — Каргалы авыл советы;
• «Революция» — Торым авыл советы;
• «Алга» — Чирмешән авыл советы;
• «Безнең юл» — Чүти авыл советы;
• «Гигант» — Чүти авыл советы;
• Молотов исемендәге колхоз (1933—1951) / «Знамя» (1951—1959);
• «Искра» — Надеждино авыл советы;
• Калинин колхозы — Иске Буа авыл советы;
• «Кызыл Байрак» — Аюкөйдергән авыл советы;
• Разин исемендәге колхоз — Иске Тәрбит авыл советы;
• «Өлҗән» — Өлҗән авыл советы;
• «Чулпан» — Бакырчы авыл советы.

1958 елда «Авангард», «Кызыл Герой» һәм «Революция» колхозлары бер «Авангард» колхозына берләшәләр (1963 елда «Подберезье» колхозына үзгәртелә)^[5].