Рубин Абдуллин

1950 елның 19 августында Мари АССР Йошкар-Ола шәһәрендә туа. Әтисе Кәбир Абдуллин — элемтә техникумы укытучысы, әнисе Саре Нури — икътисад фәннәре докторы, РФ атказанган фән эшлеклесе, Казан финанс-икътисад институты профессоры. Әнисе ягыннан карт бабасы Гази Хәбибулла (1864-1929) — Массандраның баш виноград үстерүчесе, граф Воронцов утары (Алупка шәһәре) идарәчесе булган.

«Фортепиано» белгечлеге буенча Казан дәүләт консерваториясен (профессор Э. А. Монасзон классы, 1973)^[2][3], «Оргáн» белгечлеге буенча Ленинград дәүләт консерваториясен (профессор Н. И. Оксентян классы,1974)^[2], Мәскәү дәүләт консерваториясе каршында ассистентура-стажировка (Л. И. Ройзман җитәкчелегендә, 1979) уза^[2][4] .

Рубин Кәбир улы Абдуллинның тормышы Нәҗип Җиһанов исемендәге Казан дәүләт консерваториясе белән бәйләнгән: биредә ул 1969 елда хезмәткәр буларак эшли башлый, 1969–1973 елларда концертмейстер була; 1973–1975 елларда — Казан консерваториясендә махсус фортепиано кафедрасы укытучысы (1986 елдан махсус фортепиано һәм орган); 1975–1979 елларда — махсус фортепиано кафедрасы өлкән укытучысы; 1979–1992 елларда — махсус фортепиано кафедрасы доценты; 1992–1998 елларда — махсус фортепиано һәм оргáн кафедрасы профессоры^[2]; 1988–2021 елларда — Нәҗип Җиһанов исемендәге Казан дәүләт консерваториясе (академия) ректоры^[5]; 1998 елдан — консерваториянең оргáн, клавесин һәм арфа кафедрасы мөдире^[6]; 2021 елдан — консерватория ректоры киңәшчесе^[7][2].

XX гасырда оргáн өчен язылган әсәрләрне, шул исәптән Татарстан композиторлары Шамил Шәрифуллин, А. Миргородский, Рәшит Кәлимуллин әсәрләрен беренче башкаручы булып тора. М. Мусоргскийның «Картинки с выставки», Нәҗип Җиһановның 5 нче симфониясеннән Largo, Фасил Әхмәтовның «Хәтер» әсәрләрен оргáн өчен үзгәртеп яза.

«Татарстан — Яңа Гасыр» ДТРК архивында 200 язмасы саклана. РФнең барлык оргáн үзәкләрендә, чит илләрдә (Бөекбритания, Алмания, Испания, Италия, Латвия, Литва, Франция, Швейцария, Швеция, Эстония, АКШ һ. б.) чыгыш ясый.

Шәкертләре арасында Бөтенроссия, халыкара конкурслар лауреатлары һәм дипломантлары – С. Бережная, Л. Камелина, А. Титов, Д. Зарецкий, Л. Лабзина, Е. Базова, Е. Бурундуковская, Д. Мееркова һ.б.

Казан консерваториясе катнашында халыкара, республикакүләм башкаручылар бәйгеләрен оештыручы.

Музыка сәнгате мәсьәләләре буенча мәкаләләр авторы, оргáн һәм фортепиано өчен әсәрләр җыентыкларын төзүче («Советский композитор» нәшрияты), Татарстан композиторларының оргáн өчен әсәрләре җыентыклары мөхәррире.

• 1968 ― беренче ялгыз концерты;
• 1970 ― Натан Рахлин белән берлектәге концерт;
• 1974 ― беренче оргáн концерты;

• К. Сен-Санс. Оргáн һәм оркестр өчен до минор симфониясе. Дирижер Фуат Мансуров. Казан, 1997 (CD).
• И. С. Бах. Klavierubung. III кисәк. Екатеринбург, 2000 (CD).

• 1988 — Муса Җәлил премиясе лауреаты;
• 1992 — Татарстан Республикасының халык артисты;
• 1997 — Россия Федерациясенең атказанган сәнгать эшлеклесе;
• 1997 — «Бәллүр пирамида» хәйрия фонды премиясе;
• 2000 — Россия Федерациясе дәүләт премиясе (иҗат төркеме эчендә) — Салих Сәйдәшев исемендәге Казан дәүләт Зур концерт залын төзегән өчен^[8];
• 2003 — «Россия халыклары мирасына керткән өлеше өчен» медале;
• 2007 — Россия Федерациясенең халык артисты;
• 2014 — Марий Эл Республикасының атказанган сәнгать эшлеклесе^[9].
• 2021 — Казан консерваториясенең шәрәфле профессоры^[7].