Кош теле

Татарлар (болгарлар) һәрвакыт табигать белән гармониядә яшәгәннәр, шуңа күрә милли аш-суда да ризык исемнәренең шактый өлеше хайваннар дөньясы яки хайваннарның тән өлешләре белән бәйле. Әйтик, татар кондитер эшләнмәсе «кош теле» (рус. птичьи язычки) дигәнне аңлата, мондый атаманы ул үзенчәлекле сузылган формасына бәйле алган^[1][2].

Чәй ризыгын әзерләү өчен минимум ингредиентлар кирәк, алар һәр хуҗабикәдә бар. Элек кош телен эретелгән хайван маенда кыздырганнар, хәзер исә иссезләндерелгән көнбагыш мае кулланыла.

Камыр өчен 1 кг онга^[3]:

• 10 йомырка,
• 100 г сөт,
• тәменчә тоз,
• кыздыру өчен 600 г эретелгән атланмай,
• 30 г шикәр комы (камырга),
• 100 г шикәр оны (өстенә сибәр өчен),
• аз гына чәй содасы.

Танылган кулинар, «Тамле булсын» татар ашлары рестораны хуҗабикәсе Резеда Хөсәенова рецепты буенча^[2]:

• 300 г он,
• 3 данә йомырка,
• ярты чәй калагы шикәр комы,
• ярты чәй калагы тоз,
• 2-3 аш калагы шикәр оны,
• кыздыру өчен көнбагыш мае.

Бер йомыркага аксымыннан аерылган ике йомырка сарысы өстәргә, тоз-шикәр кушып, яхшылап болгатырга, иләнгән он өстәргә һәм каты камыр басырга. Өстен пленка белән каплап, 15-20 минутка калдырырга, аннары 1―1,5 мм калынлыктагы җәем җәеп, рифланган тәгәрмәчле кискеч белән 3-3,5 см киңлектәге тасмаларга кисәргә. Аларны үз чиратында 4–5 см озынлыктагы ромбларга бүләргә кирәк. Кайнап торган майда алтынсу төскә кергәнче кыздырырга һәм, сөзгеч белән алып, кәгазь тастымал өстенә салып суытырга кирәк. Суынган кош теленә шикәр пудрасы сибәргә, вазаларга салырга һәм чәй янына бирергә була.