Сәйдә Мөхәммәтҗанова

2001 елның 12 гыйнварендә Казанда туа. Милләте — татар.

Биш яшьтән «Ак калфак» фольклор ансамблендә жырлый. Әтисе — Айрат Әнвәр улы Мөхәммәтҗанов, Свердловск өлкәсенең Югары Пышма шәһәрендә имам булып тора, шул шәһәргә күченеп яшиләр^[4][5].

2012 елда гаиләсе белән Казанга кайта һәм Идел Буе районының 22 нче балалар музыка мәктәбенә вокал һәм фортепиано классы буенча укырга керә^[6]. Бер үк вакытта Казан (Идел буе) федераль университетының Халыкара мөнәсәбәтләр институтында «төрки халыкларның икътисады һәм сәясәте» юнәлеше буенча көнчыгышны өйрәнү факультетында укый, анда төрек, инглиз һәм гарәп телләрен өйрәнә. Шул ук вакытта И. В. Әүхәдиев исемендәге Казан музыка көллиятен тәмамлый. Ике уку йортын да кызыл дипломга бетерә^[4]. КФУда «Төрки-мөселман дөньясы сәнгате тарихы» юнәлеше буенча магистратурада укуын дәвам итә^[7].

2020 елның декабреннән Казан дәүләт филармониясендә эшли башлый.

5 яшеннән «Ак калфак» фольклор ансамбле составында мөнәҗәтләр башкара, шушы төркемнең солисты була^[5]. 6 яшеннән Асылъяр һәм Габделфәт Сафин иҗат коллективларнда чыгыш ясый, Россиянең Мәскәү, Уфа, Екатеринбург, Оренбург, Чиләбе кебек шәһәрләре, Татарстан районнары буйлап гастрольләрдә була. 9 яшендә Югары Пышма шәһәренең музыка мәктәбендә үзенең беренче соло концертын оештыра. Кечкенә яшьтән күп кенә музыкаль бәйгеләрдә җиңүләр яулый^[8]. Фортепианода һәм курайда уйный^[1]. Җырчының беренче остазы — Венера Гәрәева.

2015 елда «Голос. Дети» музыкаль проектында катнаша һәм «Су буйлап» җыры белән җырчы Пелагея командасына эләгә. Нәтиҗәдә, финалга барып җитеп, 3 нче урынны били^[9]. Җырчының үз сүзләренчә, проектта катнашу максаты татар мәдәниятен бөтен ил күләмендә таныту була. Җырчы татар, рус, француз, итальян, португал, гарәп, инглиз һәм төрек телләрендә җырлый^[6].

2020 елда Dairafest этник фестивалендә катнашты, Санкт-Петербургның «Летания» оркестры белән дәүләт академия капелласында чыгыш ясый. Соңрак алар белән 2021 елда Санкт-Петербургта сольный концерт оештырыла^[10].

2023 елда «Зәңгәр шәл» вокаль-хореографик спектаклендә «Казан» бию ансамбле белән уңышлы дебют ясый^[11], 2024 елда Галиәсгар Камал исемендәге театрда «Зәңгәр шәл» спектаклендә Мәйсәрә ролен башкара^[12], Казан шәһәр филармониясенең «Йосыф-Зөләйха» вокал-хореографик спектаклендә катнаша^[13].

2024 елда Үзбәкстанда узган Ovoz телешоуында катнаша. Сукыр тыңлауларда «Гөлҗамал» җырын башкара һәм үзенә остазлыкка Севара Назарханны сайлый^[9][14]. Ярымфиналда җырчы Шохрухмирзо Ганиевка, тамашачылар биргән тавышларда булган 3 % аерма белән, оттыра^[15].

2024 елның декабрь аенда «Ярату» исемле беренче зур сольный концертын куя^[16]. Сольный концертына һәм «Эсперанто» альбомы чыгуга нисбәтле матбугат конференциясе үткәрә^[17].

2024 елда Зөлфәт Хәким повесте буенча төшерелгән «Телсез күке» фильмында (режиссёры — Рәүф Кубаев) Кәшифә ролен уйный^[15], әлеге фильм аның кинодебюты була^[18]. Эшне «Алтын мөнбәр» халыкара кинофестивалендә тәкъдим итәләр.

Искәндәр Мостафин, Ринат Вәлиев, Луиза Батыр-Болгари кебек сәнгать эшлеклеләре белән эшли^[7].

2025 елның 6 февралендә Сәидә Мөхәммәтҗановага «Татарстан Республикасының атказанган артисты» дәрәҗәле исеме бирелә^[19].

• «Балачактан килми китәсе» (2015);
• «Су буйлап» (2023);
• «Эсперанто» (2024)^[21].

• 2014 — «Созвездие-Йолдызлык» фестивалендә Гран-при;
• 2015 — Беренче телеканалы уздырган «Голос. Дети» проекты лауреаты;
• 2024 — Ovoz ("The Voice"ның үзбәк версиясе) телешоу ярымфиналына җитә;
• 2024 — «БИЗНЕС Online» электрон газеты фикеренчә, Сәйдә Мөхәммәтҗанова — Татарстан мәдәниятында ел кешесе^[22];
• 2025 — Татарстан Республикасының атказанган артисты^[23].