Рөстәм Маликов

1949 елның 20 июлендә Татарстан АССР Минзәлә районы Бикбау авылында туган. Әтисе башка гаиләгә киткәч, ике апасы белән бергә әнисе тәрбисендә үсә^[1][2][3].

Яшь чактан үзешчән сәнгатьтә катнаша. Мәктәпне тәмамлаганнан соң, Читада ракета гаскәрләрендә хәрби хезмәт уза, аннары Казанга килә һәм музыка училищесының вокал бүлегенә укырга керә, Михаил Федорович Кольцов, Лилия Ивановна Гафенко классында укый.^[4] Училищедан соң Казан консерваториясендә (РСФСР халык артисты З. Г. Хисмәтуллина курсы) белем ала һәм аны 1980 елда тәмамлый.^[5]

Уфага китә, анда 1980–1988 елларда Башкорт филармониясендә солист булып эшли, җырчы буларак таныла^[6][2][7]. Бу вакытта композиторлар Рәүф Мортазин, Хөсәен Әхмәтов, Рим Хәсәнов белән хезмәттәшлек итә, ^[3] педагог-концертмейстер Радик Хәбибуллин белән эшли^[8], иҗади эзләнүдә була һәм концерт репертуары туплый^[9]. 1988 елда Казанга әйләнеп кайта, Татар филармониясе каршындагы музыкаль-әдәби лекторийның әйдәп баручы вокалисты һәм А. И. Шутиков җитәкчелегендәге халык уен кораллары оркестры солисты була, биредә 2011 елга кадәр эшли^[6][3][2][7]. 2011 елдан – Казан дәүләт мәдәният институтында музыка сәнгате факультетының ялгыз җырлау кафедрасы укытучысы, доцент^[7][10]. Гастрольләрдә йөри һәм концерт программаларын яздыра^[6][2], музыкаль фестивальләрдә һәм мастер-классларда катнаша^[11][12].

Җырчының тавышы – лирик-драматик тенор^[6][2]. Белгечләр фикеренчә, җырчыга табигатьтән сирәк очрый торган матур, көчле экспрессив тавыш өстенә югары профессиональлек тә бирелгән^[7]. Аның талантына РСФСР халык артисты Илһам Шакиров югары бәя бирә^[13]. Мультиинструменталист^[14], аерым алганда курайда уйный^[15]. Маликовның репертуары киң һәм төрле, ул камера-вокаль музыкасын, Көнбатыш Аурупа һәм рус классикларының операларыннан арияләр, хәзерге заман рус һәм чит ил композиторларының әсәрләрен үз эченә ала. Аерым алганда, Альфред («Травиата», Дж. Верди), Рудольф («Богема», Дж. Пуччини), Ленский («Евгений Онегин», П. Чайковский), Германн («Пиковая дама», П. Чайковский), Левко («Майская ночь», Н. Римский-Корсаков), Җәлил («Җәлил», Н. Җиһанов), Салават («Салават Юлаев», З. Исмәгыйлев) арияләре, М. Глинка, П. Чайковский, С. Рахманинов романслары, рус, украин, итальян халык җырлары, илебез композиторларының җырлары. Җырчының репертуарында татар («Туган тел», «Рәйхан», «Кара урман») һәм башкорт («Азамат», «Кара юрга», «Уралым» һ.б.) халык җырлары мөһим урын алып тора. Татар композиторларының, аерым алганда, С. Сәйдәшев, Җ. Фәйзи, М. Мозаффаров, Р. Яхин, Ә. Бакиров, С. Садыйкова, Р. Ениикеев, Р. Әхиярова вокаль музыкасын башкара^[6][1][2].

• 1984 – Башкортстан АССР атказанган артисты;
• 1994 – Татарстанның халык артисты.

Беренче никахы – Гүзәл Маликова (1960 елгы)^[16], җырчы, Татарстанның атказанган мәдәният хезмәткәре һәм артисты^[17][18][19]. Уллары шулай ук музыкантлар. Муса маликов Франкфурт-на-Майне югары музыка мәктәбенең аспирантурасын һәм докторантурасын тәмамлый^[20], җырчы, саксофончы (Алмания); Гайсә^[21] — гобойчы, баянчы, халыкара һәм Бөтенроссия конкурслары лауреаты^{[22][23][24][25]}.

Икенче хатыны – (2023 елдан) Ләйсән Маликова (1978 елгы), чит телләр һәм татар әдәбияты укытучысы^[26].