Дмитрий Патрушев

Дмитрий Патрушев 1977 елның 13 октябрендә Ленинград шәһәрендә туа^[7].

1999 елда «Менеджмент» белгечлеге буенча Дәүләт идарә университетын тәмамлый ^[7][8].

2002–2004 елларда «Мировая экономика» белгечлеге буенча Россия Тышкы эшләр министрлыгының дипломати академиясендә белем ала.

2006 елда Федераль куркынычсызлык хезмәте академиясен тәмамлый.

2003 елның 16 апрелендә Санкт-Петербург дәүләт икътисад һәм финанс университетында «Фәнни-тикшеренү оешмаларының сыйфаты белән идарә итүдә процесслы якын килүне үстерүнең оештыру-икътисади нигезләре» темасына икътисад фәннәре кандидаты гыйльми дәрәҗәсенә диссертация яклый^[9] (фәнни җитәкчесе — Г.Н. Иванова; рәсми оппонентлары — Б.В. Прянков һәм П.М. Шавкунов^[10]).

2008 елның 3 июлендә Санкт-Петербург дәүләт икътисад һәм финанс университетында «Сәнәгать сәясәтен формалаштыруда һәм гамәлгә ашыруда дәүләт һәм базар регуляторлары: ТЭКның табигый монополияләре материаллары нигезендә» темасына икътисад фәннәре докторы гыйльми дәрәҗәсенә диссертация яклый^[9] (фәнни консультант — В.В. Корелин; рәсми оппонентлары — В.В. Глухов, А.В. Круглов, С.А. Уваров^[11]).

1999–2002 елларда Россия Федерациясе Транспорт министрлыгында эшли^[7][8].

2004 елда ВТБ банкында эшли башлый^[7][8].

2007 елдан Патрушев ВТБ банкы өлкән вице-президенты вазифасында.

2010–2018 елларда — «Россельхозбанк» ААҖ идарәсе рәисе, күзәтү советы әгъзасы^[12]. Патрушев вакытында банкта физик затлар өчен дә, бизнес өчен дә продуктлар һәм хезмәтләр саны арта. Иминият һәм инвестицияләр кебек яңа юнәлешләр барлыкка килә. Агросәнәгать комплексына ярдәм күләмнәре дә артты. 2010 елдан 2017 елга кадәр РСХБның кредит портфеле дүрт тапкырга арта. 2017 елда ул 2,97 триллион сум тәшкил итә^[13].

2016–2021 елларда —«Газпром» АҖ директорлар советы әгъзасы^[14].

2018 елның 18 маенда Патрушев Россия Федерациясе Авыл хуҗалыгы министрлыгын җитәкли^[15], 2020 елның 21 гыйнварында әлеге вазифага яңадан билгеләнә.

2024 елның 11 маенда Михаил Мишустин Дәүләт Думасы каравына хөкүмәтнең яңа составын кертә, вице-премьер вазифасына Патрушев кандидатурасы тәкъдим ителә^[16]. 13 майда Дәүләт думасы аны бу постка раслый^[17]. 14 майда РФ Президенты билгеләү турындагы указга кул куя^[18].

Яңа вазифасында түбәндәге өлкәләр өчен җавап бирә:

• авыл хуҗалыгы, агросәнәгать комплексы, шул исәптән виноградчылык һәм шәраб ясау, авыл хуҗалыгы билгеләнешендәге җирләргә бәйле җир мөнәсәбәтләре, авыл территорияләрен үстерү, балык хуҗалыгы һәм балык үрчетү, урман хуҗалыгы һәм урман сәнәгате комплексы өлкәсендә дәүләт сәясәте;
• «Экология» милли проектын эшләү, гамәлгә ашыру һәм контрольдә тоту;
• кайбер министрлыклар, федераль хезмәтләр һәм агентлыклар эшчәнлеген координацияләү^[19].

2016 елдан — «Газпром» АҖ директорлар советы әгъзасы^[20][21].

2018 елдан —«Россельхозбанк» АҖ күзәтү советы рәисе^[22][23].