Антон Котяков

Антон Котяков 1980 елның 15 августында Куйбышев шәһәрендә туа. 1997 елда авиация юнәлешендәге 135 нче Самара мәктәп-лицеен тәмамлый. 2002 елда «икътисад теориясе» белгечлеге «Кыйммәтле кәгазьләр базарын оештыру һәм теориясе» специализациясе буенча Самара дәүләт икътисад академиясен тәмамлый.

2001 елның августыннан 2005 елның августына кадәр Самара өлкәсе администрациясенең финанслар белән идарә итү департаментында әйдәп баручы белгечтән консультант дәрәҗәсенә кадәр юл уза.

2005 елда аспирантураны тәмамлый, «Россия субфедераль бурыч кәгазьләре базары: аякка басу һәм үсеш» темасына кандидатлык диссертациясен яклый, аңа икътисад фәннәре кандидаты гыйльми дәрәҗәсе бирелә.

2005 елның августыннан 2007 елның июленә кадәр Самара өлкәсенең финанслар белән идарә итү бүлеге башлыгы булып эшли. Соңрак Самара өлкәсе финанслар белән идарә итү министрлыгының өлкә бюджеты һәм хисап департаменты җитәкчесе итеп билгеләнә, ул вазифасында 2012 елның апреленә кадәр эшли.

2011 елда Россия Федерациясе Президенты каршындагы Россия халык хуҗалыгы һәм дәүләт хезмәте академиясендә «административ һәм финанс хокукы» белгечлеге буенча магистратура тәмамлый.

2012 елның апреленнән 2014 елның мартына кадәр Федераль казначылыкта функциональ эшчәнлекне камилләштерү идарәсе башлыгы вазифасында эшли.

2014 елның мартында Мәскәү өлкәсе хөкүмәтенә эшкә күчә. 2017 елның гыйнварына кадәр Мәскәү өлкәсенең финанслар министры вазифасында эшли, аннан соң Мәскәү өлкәсенең берләштерелгән икътисад һәм финанслар министрлыгын җитәкли.

2017 елның маеннан 2020 елның гыйнварына кадәр Россия Федерациясе финанс министры урынбасары булып эшли.

РФ Президенты каршындагы Россия халык хуҗалыгы һәм дәүләт хезмәте академиясенең Югары мәктәбенең Кадрлар идарә резервын үстерү программасының өченче җыелмасында катнашучы (2019).

2020 елның 21 гыйнварында Россия Президенты Владимир Путин указы белән Россия Федерациясе Хезмәт һәм социаль яклау министры итеп билгеләнә.

Россия Федерациясенең 3 нче класслы хакыйкый дәүләт киңәшчесе^[4]. Самара өлкәсенең 1 класслы дәүләт киңәшчесе.

2024 елның 14 маенда Дәүләт Думасы Котяковны Россия Федерациясе хезмәт һәм социаль яклау министры вазыйфасында кабат раслый^[5], шул ук көнне РФ президенты боерыкка кул куя^[6].

3 нче класслы Россия Федерациясе чын дәүләт киңәшчесе. 1 нче класслы Самара өлкәсе дәүләт киңәшчесе.

Котяков Евросоюз, АКШ, Канада, Швейцария, Австралия һәм Яңа Зеландиянең санкция исемлекләренә кертелгән^[7]

• III дәрәҗә «Мәскәү өлкәсе алдындагы казанышлары өчен» билгесе (2017)^[8];
• Мәскәү өлкәсе Губернаторының мактау грамотасы (2015);
• «Генерал-полковник Дутов» медале (2013);
• Россия Федерациясе Федераль казначылыгының мактау грамотасы (2012);
• Россия Федерациясе сәнәгать һәм сәүдә министрлыгының рәхмәт хаты (2012);
• «Федераль казначылыкка 20 ел» медале (2012);
• Самара өлкәсенең финанслар белән идарә итү министрлыгының мактау грамотасы (2010).

Өйләнгән, өч баласы бар^[9].