Галина Лоцманова

1944 елның 4 апрелендә Казанда туган. Хезмәт юлын 1962 елда Казан электрон хисаплау машиналары заводында башлый, чорнаучы, мастер, монтажчы һөнәрләрен үзләштерә (1962—1985)^[1]. 1964—1968 елларда Казан шәһәренең Бауман районы «Пионер» фабрикасында комсомол оешмасы сәркатибе вазифасында. 1973 елда читтән торып Казан элемтә электротехникумын тәмамлый^[2].

1968—1985 елларда партия эшендә: КПССның Бауман район комитетында инструктор, бүлек мөдире урынбасары, сәркатип, икенче сәркатип; 1971—1986 елларда КПСС Үзәк ревизия комиссиясе әгъзасы; 1975—1990 елларда ТАССР Югары Шурасы депутаты. 1981 елда Саратов югары партия мәктәбен бетерә^[1].

1985—1996 елларда ТАССР (1991 елдан Татарстан) социаль тәэминат министры. 1996—2000 елларда Татарстан социаль тәэминат министры урынбасары. 2000 елның гыйнварыннан июненә кадәр пенсия бүлегенең баш белгече булып эшли^[2]. Бу чорда республиканың социаль яклау системасын үстерүгә, республиканың законнар базасын формалаштыруга зур өлеш кертә: «Ветераннар турында», «Өлкән яшьтәге гражданнарга һәм инвалидларга социаль хезмәт күрсәтү турында», «Россия Федерациясендә инвалидларны социаль яклау турында» кебек әһәмиятле законнарның гамәлгә ашырылуын координацияли^[3].

• «В. И. Ленинның тууына 100 ел тулу уңаеннан» медале (1971);
• Хезмәт Кызыл Байрагы ордены (1974);
• ТАССР Югары Советы Президиумының Мактау кәгазе (1985);
• Татарстан Республикасының Мактау кәгазе (1994);
• II дәрәҗә «Ватан алдындагы казанышлар өчен» ордены медале (1998)^[4].
• Татарстан Республикасы Президентының Рәхмәт хаты (2004);
• «Казанның 1000 еллыгы истәлегенә» медале (2005)^[2];
• Татарстан Республикасының атказанган социаль яклау хезмәткәре (2015)^[5].

• Лоцманова, Галина Павловна. Заботы и радости [О работе нар. депутатов] / Г. П. Лоцманова. — Казань : Татар. кн. изд-во, 1985. — 32 с. : 20 см^[6].