Николай Барышев (1898)

1898 елның 13 ноябрендә (25 ноябрендә) Уфа губернасы Стәрлетамак шәһәрендә туган. 4 класслы шәһәр мәктәбен тәмамлагач, Казанга китә, Казан сәнгать укуханәсенә укырга керә. Укуын тәмамламыйча, Мәскәүгә күчә, «Копейка» газетасына корректор булып эшкә урнаша. Шанявский исемендәге халык университетында шөгыльләнә, авыл хуҗалыгы академиясендә ирекле тыңлаучы була. 1917 ел башында армиягә алына, Чистайга прапорщиклар мәктәбенә җибәрелә.

• 1919 Казан губернасы Чистай өязе халык мәгарифе бүлеге мөдире.
• 1919-1921 РКП (б) Чистай өяз комитеты рәисе була. Бераз вакыт Тәтештә, Минзәләдә эшләп ала.
• 1921, март-1921, июль РКП (б) Татарстан өлкә комитеты җаваплы сәркатибе. Биредә эшләгәндә ачлыкка каршы көрәш, тәрбиясез калган балаларны урнаштыру, завод-фабрикаларны чимал белән тәэмин итү, транспортны көйләү, наданлыкны бетерү мәсьәләләрен чишүдә катнаша.
• 1921–1924 Украина коммунистлар фиркасенең Сумы округ комитеты җаваплы сәркатибе.
• 1924-1926 Украина коммунистлар фиркасенең Кара диңгез округ комитеты инструкторы, соңыннан җаваплы сәркатибе.
• 1926-1928, июнь ВКП (б) Кубань округ комитеты җаваплы сәркатибе.
• 1928-1930 ВКП (б) Якутия өлкә комитеты җаваплы сәркатибе.
• 1930-1935 ВКП (б) үзәк комитеты аппаратында эшли. Мәскәү өлкәсе башкарма комитеты рәисе урынбасары, Мәскәү шәһәр комитетының мәдәният һәм пропаганда бүлеге мөдире. Кызыл профессура институтында укый. ССРБ җир эшләре халык комиссариатының Үзәк кара туфраклы өлкәсендә сәяси сектор башлыгы булып тора.
• 1935-1937 ВКП (б) Сарытау край комитеты икенче сәркатибе, соңыннан Сарытау башкарма комитеты рәисе.

1937 елның 24 июнендә кулга алына. «Инкыйлабка һәм фиркагә каршы уң троцкийчы оешма әгъзасы булу, фирка-дәүләт башлыкларына каршы теракт әзерләү»дә гаепләнеп, ССРБ югары суды хәрби коллегиясе тарафыннан хөкем ителә, 1937 елның 30 октябрендә Мәскәүдә атып үтерелә^[1]. 1956 елда аклана.