Зөфәр Галиуллин
Зөфәр Шәйдулла улы Галиуллин (рус. Зуфар Шайдуллович Галиуллин; 1 гыйнвар 1957, Казан) ― Россия дин эшлеклесе, мөфти, Россия мөселманнарының Үзәк Диния нәзарәте составындагы Киров өлкәсе мөселманнарының төбәк дини идарәсе рәисе (2013 елдан), Вятка мөфтие[1][2][3]. 1997–2010 елларда Колшәриф мәчете имамы булып эшли[1].
Тәрҗемәи хәле
1957 елның 1 гыйнварында Казанда туган[1].
1974–1977 елларда «Теплоконтроль» заводында механик җыю эшләре слесаре булып эшли. 1977–1981 елларда Казан дәүләт мәдәният институтының мәдәни-агарту факультетында белем ала һәм институтны тәмамлаганнан соң Казан телевидениесендә эшли. 1984 елдан СПТУ-11 дә укыту-тәрбия эшләре буенча директор урынбасары булып эшли[1].
1987 елдан «Уренгой — Помары — Ужгород» газүткәргечен салуда катнаша. 1988 елдан Казанның «Әл-Мәрҗани» мәчетендә казначы булып эшли. 1989 елда Идел буенда ислам динен кабул итүнең 1100 еллыгын үткәрү өчен җаваплы була[1].
1989–1992 елларда Бохара шәһәрендәге «Мир-Араб» мәдрәсәсендә укый. 1992 елдан Югары мөфти Тәлгать Таҗетдин билгеләве буенча Казанның «Борнай» мәчетендә имам-хатыйб булып эшли[1].
1994–1997 елларда Багдадтагы Ислам университетында белем ала[1]. 1997 елда Казан имамнары тарафыннан төзелеп килүче «Кол Шәриф» мәчетенә имам итеп сайлана һәм анда 2010 елга кадәр эшли[1][3].
Галиуллин 12 ел дәвамында Татарстан Республикасы мөселманнарының Диния нәзарәте Президиумы составында була һәм көч структуралары белән элемтә өчен җавап бирә. Ул Казан шәһәренең 18нче колониясендә дә укыта[1].
2007–2011 елларда Казандагы Россия ислам университетының теология бүлегендә белем ала[1].
2013 елда Киров өлкәсе мөселманнарының төбәк дини идарәсе рәисе — Вятка мөфтие итеп сайлана. Ул бу вазифада үз теләге белән отставкага киткән Габденнур Сәлим улы Камалетдинны алыштыра[3]. Киров өлкәсе мөселман җәмгыятьләрен берләштерү, мәгърифәтчелек һәм дини белем бирү эшләре белән шөгыльләнә[4]
Бүләкләре һәм премияләре
- «Казанның 1000 еллыгы истәлегенә» медале[1];
- «Иман һәм Игелек өчен» медале[1];
- 2012 елда Татарстан Республикасының Габдулла Тукай исемендәге дәүләт премиясе — Кол Шәриф мәчете архитектура комплексы иҗатчыларының иҗади коллективы составында. Бүләк Галиуллинга архитектура ансамбленең дини концепциясен эшләгән өчен бирелә[2][5].
Гаилә хәле
Өйләнгән, өч бала тәрбияли[1].
Искәрмәләр
- ↑ 1 2 3 4 5 6 7 8 9 10 11 12 13 Муфтий Кировской области Зуфар Галиуллин. Центральное духовное управление мусульман России. Мөрәҗәгать итү датасы: 30 июль 2026.
- ↑ 1 2 Галиуллин Зөфәр Шәйдулла улы. Татар энциклопедиясе TATARICA. Мөрәҗәгать итү датасы: 6 август 2026.
- ↑ 1 2 3 В Кировской области был выбран новый муфтий. Бөтендөнья татар конгрессы. Мөрәҗәгать итү датасы: 6 август 2026.
- ↑ РДУМ Кировской области. Россия мөселманнарының Үзәк Диния нәзарәте. Мөрәҗәгать итү датасы: 6 август 2026.
- ↑ Лауреаты премий им. Г. Тукая (2011–2015 гг.). Татарстан Республикасы Милли китапханәсе. Мөрәҗәгать итү датасы: 6 август 2026.
Сылтамалар
- Муфтий Кировской области Зуфар Галиуллин // Россия мөселманнарының Үзәк Диния нәзарәте
- Галиуллин Зөфәр Шәйдулла улы // Татарика
