Силуанов Антон Германович

Антон Силуанов 1963 елның 12 апрелендә Мәскәүдә профессиональ финансистлар Герман Михайлович һәм Янина Николаевна Силуановлар гаиләсендә туа.

1985 елда Антон Силуанов «финанслар һәм кредит» белгечлеге буенча Мәскәү финанс институтын тәмамлый.

1985 елның августыннан 1987 елның мартына кадәр «Гипрорыба» оешмасында икътисадчы, Россия Совет Федератив Социалистик Республикасының Финанас министрлыгында өлкән икътисадчы булып эшли.

1987 елның мартыннан 1989 елның маена кадәр Совет Армиясендә хезмәт итә.

1989 елның маеннан 1992 елның гыйнварына кадәр РСФСР Финанс министрлыгында алдынгы икътисадчы, 1 нче категорияле икътисадчы, бүлек мөдире урынбасары һәм киңәшче вазифаларын башкара.

1992 елның февралендә Россия Федерациясе Икътисад һәм финанс министрлыгының бүлек начальнигы урынбасары итеп билгеләнә.

1992 елның февраленнән 1997 елның октябренә кадәр Антон Силуанов Россия Федерациясе Финанс министрлыгының бюджет идарәсе бүлеге башлыгы урынбасары — бүлек башлыгы, Бюджет департаменты җитәкчесе урынбасары^[1].

1994 елда Антон Силуанов «Россия Федерациясе мисалында базар мөнәсәбәтләренә күчү шартларында дәүләтнең бюджет сәясәте» темасы буенча икътисад фәннәре кандидаты гыйльми дәрәҗәсенә диссертация яклый (белгечлеге — 08.00.10 «Финанслар, акча әйләнеше һәм кредит»)^[2].

1997 елның октябреннән 2003 елның июленә кадәр Россия Федерациясе Финанс министрлыгының Макроикътисади сәясәт һәм банк эшчәнлеге департаменты җитәкчесе.

2001 елның 22 мартыннан Россия Федерациясе Финанс министрлыгы коллегиясе әгъзасы.

2003 елның июленнән 2004 елның маена кадәр Россия Федерациясе Финанс министры урынбасары.

2004 елның маеннан 2005 елның 12 декабренә кадәр Россия Федерациясе Финанс министрлыгының Бюджетара мөнәсәбәтләр департаменты директоры.

2005 елның 12 декабреннән Россия Федерациясе Финанс министры урынбасары.

2011 елның 27 сентябреннән Россия Федерациясе Финанс министры вазифаларын башкаручы.

2011 елның 16 декабреннән Россия Федерациясе Финанс министры итеп билгеләнә^[3] һәм Россия Федерациясе Куркынычсызлык советы составына кертелә^[4].

2012 елда Антон Силуанов «Россиядә федерализм үсеше шартларында бюджетара мөнәсәбәтләр» темасына икътисад фәннәре докторы гыйльми дәрәҗәсенә диссертация яклый (белгечлеге — 08.00.10 «Финанслар, акча әйләнеше һәм кредит»). Рәсми оппонентлары — икътисад фәннәре докторы, профессор Абел Аганбегян, икътисад фәннәре докторы Сергей Синельников-Мурылёв һәм икътисад фәннәре докторы, профессор Людмила Лыкова^[5].

2013 елның гыйнварыннан РФ Хөкүмәте карамагындагы Финанс университетының финанс-икътисад факультеты деканы.

2015 елның гыйнварында Антон Силуанов РФ Хөкүмәте тарафыннан Россия Саклык банкының Күзәтү советы әгъзасы вазифасына тәкъдим ителә^[6].

2016 елның февралендә «Бердәм Россия» партиясенең югары советыннан китә (2012 елдан аның әгъзасы булган).

2017 елның апреленнән Антон Силуанов ВТБ банкының Күзәтү советы рәисе^[7].

2018 елның 18 маенда Россия Федерациясе Президенты Владимир Путин Указы белән Россия Федерациясе Хөкүмәте Рәисенең беренче урынбасары — Россия Федерациясе финанс министры вазифасына билгеләнә^[8].

Дмитрий Медведев җитәкчелегендәге хөкүмәтнең отставкасыннан соң, 2020 елның гыйнварында беренче вице-премьер вазифасын югалткан^[9], финанс министры урынын саклап калган.

2024 елның 14 маенда Дәүләт Думасы тарафыннан Россия Федерациясе Финанс министры вазифасына яңадан раслана^[10], шул ук көнне РФ Президенты вазифага билгеләү турында указ имзалый^[11].

2018 елда Антон Силуанов Россиядә пенсия яшен арттыру турындагы канун кабул итүнең төп тарафдарларының берсе. Бу карар гражданнарның канәгатьсезлеген тудыра, әлеге эш футбол буенча дөнья чемпионаты фонында тиз арада тәкъдим ителүе белән көчәйде. Антон Силуановның дөнья чемпионаты башлану белән реформаны тәкъдим итүнең «очраклы» булуы, аның киң җәмәгатьчелек тарафыннан «тикшерелүе», соңрак халыкның пенсия системасындагы үзгәрешләргә авыр реакциясенең «көтелмәгәнлеге» турындагы белдерүләре күпләрне аптырашта калдырды^[12].

Россия Федерациясе финанс министры сыйфатында сәясәтче Мәскәү — Казан югары тизлекле тимер юл магистрален төзү проектының төп тәнкыйтьчесе һәм проектны тоткарлаучы булып тора^[13][14].

2019 елның апрелендә Антон Силуанов мәктәпләргә шәхси эшмәкәрлекне булдыруны пропагандалау курсын кертүне тәкъдим итә^[15].

2019 елда министр ВТБ башлыгы Андрей Костинның түбән керемле россиялеләр өчен, шулай ук кече һәм урта эшмәкәрлек предприятиеләре өчен салымнарны киметү тәкъдименнән катгый баш тарта^[16].

Андрей Силуанов фикеренчә, 2020 елда Россиядә хезмәткә салым югары була. Канун буенча Россиядә эш бирүче хезмәткәр өчен хезмәт хакының 30 % күләмендә иминият кертемнәрен түләргә тиеш. 22 % ы — Россия Федерациясе Пенсия фондына, 5,1 % ы — мәҗбүри медицина иминиятенә, 2,9 % ы — социаль иминияткә күчерелә. Шулай ук хезмәткәрнең 13 % салым физик затларның хезмәт хакыннан тотып калына. Мондый югары салымнар Россиядә яшерен хезмәт хакы («конвертларда» бирелә торган) барлык тулаем эчке продуктның 13 % тәшкил итә. Россиядә хезмәткә салымнарның даими ставкасы дөньяда иң югарыларның берсе булып тора, ул уртача предприятиеләрнең коммерцияле табышының 36,6 % тәшкил итә. Чагыштыру тикшеренүләре күрсәткәнчә, Казакъстанда хезмәткә салым ставкасы нибары 10,1 %, Америка Кушма Штатларында — 9,8 %, Канадада — 12,7 %, Германиядә — 21,5 %, Бөекбританиядә — 12 %. Россия Хөкүмәтенең салымнарны киметергә теләмәвен финанс министры Антон Силуанов Федераль бюджетны балансламау һәм РФ Пенсия фонды бөлгенлеккә төшүдән курку белән аңлата^[17].

Әтисе — Герман Михайлович Силуанов (1937 елның 25 февралендә туган), 1961 елда Мәскәү дәүләт икътисад институтының «финанслар» факультетын тәмамлый, уку елларында факультетның комсомол оешмасы секретаре урынбасары булып эшли. Герман Силуанов институтны тәмамлагач, Мәскәүдә калдырылган өч чыгарылыш укучысының берсе була, аны Совет Социалистик Республикалар Берлегенең Дәүләт иминлеге комитетына билгелиләр. Биредә ул озак эшләми, факультет деканы Раиса Васильевна Гужкова ярдәмен белән аны ССРБ Финанслар министрлыгының сәнәгатьне финанслау идарәсенә, Раиса Васильеваның ире Иван Васильевич Гужков җитәкчелегендә эшләргә күчерәләр. Комсомол активисты, Финанс министрлыгында дивар газеты редколлегиясе әгъзасы^[18] була. 1991 елда РСФСР Финанс министрлыгының бүлек башлыгы вазифасын башкара^[1], 1996 елда РФ Финанс министрлыгының кредит һәм акча әйләнеше департаменты башлыгы урынбасары итеп билгеләнә, 1996 елда пенсиягә чыга. Бу департаментны макроикътисад өлкәсендә сәясәт белән шөгыльләнә торган башка департамент белән берләштерәләр, нәтиҗәдә — макроикътисад һәм банкларның яңа департаменты барлыкка килә, департамент җитәкчесе итеп Антон Силуанов билгеләнә.

Әнисе — Янина Николаевна Силуанова (1936 елның 20 гыйнварында туган), «Финанслар һәм статистика» нәшриятында, Россия Федерациясенең Финанс министрлыгы дәүләт университетының редакция-нәшрият бүлеге хезмәткәре булып эшләгән.

Антон Силуановның абыйсы бар, исеме — Всеволод (1976 елның 18 февралендә туган), ул шулай ук Россия Федерациясе Финанс министрлыгы хезмәткәре^[19][20].

Өйләнгән, әмма 2016 елда Антон Силуановның керемнәре күрсәтелгән декларациядә хатыны турындагы мәгълүмат юк^[21].

Улы — Глеб (1999 елда туган), Россия Федерациясе Хөкүмәте карамагындагы Финанс университеты студенты, яшь сәясәтчеләр мәктәбен тәмамлаган, байкер^[19][20][22].

Улы — Алексей. 2023 елдан «Аэрофлот» төбәк үсеше департаменты җитәкчесе^[23].

Антон Силуанов мотоциклларда йөрү һәм су асты аулары белән мавыга, грампластинкалар коллекцияли. Немец телен белә^[20].

Аның Facebook һәм Instagramда аккаунтлары булган, әмма аларга тәхәллүс белән теркәлгән: «Үзем язмыйм диярлек, анда минем дусларым ким дигәндә ун кеше. Социаль челтәрләрдә миңа вакыйгалар турында фикер алышу, кулланучыларның шәрехләре кызыклы», дип белдерә сәясәтче.

• III дәрәҗә «Ватан алдындагы казанышлар өчен» ордены (2013 елның 15 апреле) — дәүләт финанс сәясәтен уздыруга зур өлеш керткән һәм күпьеллык намуслы хезмәт өчен^[24];
• IV дәрәҗә «Ватан алдындагы казанышлар өчен» ордены (2011 елның 2 феврале) — ирешелгән хезмәт уңышлары һәм күпьеллык намуслы хезмәт өчен^[25];
• I дәрәҗә «Ватан алдындагы казанышлар өчен» ордены медале (2007 елның 13 апреле) — икътисад һәм финанс эшчәнлеге өлкәсендәге казанышлар өчен^[26];
• Россия Федерациясе Президентының Мактау грамотасы (2010 елның 18 ноябре) — электрон мәгълүмат саклагычлары булган чит ил паспортларын әйләнешкә кертүне үз вакытында тәэмин иткән өчен^[27];
• Россия Федерациясе Президентының Рәхмәте (2012 елның 1 сентябре) — икътисад, финанс эшчәнлеге өлкәсендәге казанышлар һәм күпьеллык намуслы хезмәт өчен^[28];
• Россия Федерациясе Президентының Рәхмәте (2002 елның 6 сентябре) — икътисад һәм финанс эшчәнлеге өлкәсендәге казанышлар өчен^[29];
• Россия Федерациясе Финанс министрлыгының Мактау грамотасы (2001 ел);
• Россия Федерациясе Финанс министрының Рәхмәте (2002 ел);
• «Поляр Йолдыз» Ордены (Якутия)^[30];
• «Дуслык» ордены (Татарстан, 2015 ел)^[31];
• «Чечен Республикасы алдындагы казанышлар өчен» медале (2008 елның 24 ноябре) — Чечен Республикасында дәүләт финанс сәясәтен уздыруга зур өлеш керткән өчен^[32];
• «Карелия Республикасы алдындагы казанышлар өчен» медале (2020 елның 8 июне) — Карелия Республикасы һәм аның халкы алдындагы казанышлар, республиканың социаль-икътисади үсешенә зур өлеш керткән һәм Карелия Республикасы оешуның 100 еллыгын бәйрәм итүгә әзерлек буенча дәүләт комиссиясе составында актив эшләгән өчен^[33].

• Россиядә федерализм үсеше шартларында бюджетара мөнәсәбәтләр. — М.: Дело, 2011. — 295 с. : ил., табл.; ISBN 978-5-7749-0660-4.