Ринат Гобәйдуллин (1960)

Ринат Гобәйдуллин 1960 елның 21 июнендә Татарстан АССРның Яшел Үзән шәһәрендә туган^[2]. Ата-анасы тумышы белән Татарстанның Кайбыч районы Олы Урсак авылыннан.

1986 елда Куйбышев исемендәге Казан дәүләт финанс-икътисад институтын тәмамлый. Хезмәт эшчәнлеген гади эшче булып башлый: 1977 елда Яшел Үзән ашханәләр тресты эшчесе, 1978 елда Идел буе фанера заводы эшчесе, Казан Суворов хәрби училищесында машина йөртүче, Казан финанс-икътисад институты эшчесе.

1978 елда Совет Армиясенә алына, Хәрби-Диңгез флоты сафларында хезмәт итә^[3].

1986 елдан бирле Татарстан Республикасы агросәнәгать комитетында өлкән ревизор-инспектор, бүлекнең баш икътисадчысы, сектор башлыгы булып эшли.

1993—1996 елларда — «Золотой колос» чек инвестиция фонды идарәчесе, «Татфондбанк» президенты.

1996 елдан дәүләт милкен хосусыйлаштыру буенча Татарстан Дәүләт комитеты рәисе. Комитет бетерелгәннән соң — республика финанс министрының беренче урынбасары. 1997 елдан — «Ак Барс Банк» идарәсе рәисе.

1998 елдан — Татарстан Республикасы Президенты каршындагы финанс мәсьәләләре буенча дәүләт киңәшчесе.

1998 елның июлендә премьер-министры урынбасары һәм Татарстан Республикасы Икътисад һәм сәнәгать министры вазифасында раслана.

1998 елның июнендә «Татнефть» АҖ директорлар советы рәисе итеп сайлана^[2]. 1999 елның язында Хөкүмәттәге вазифасыннан азат ителә.

1999–2003 елларда — «"Татфондбанк" АИКБ» ААҖ директорлар советы рәисе.

1999 елның декабрендә Татарстан Республикасының халык депутаты итеп сайлана.

2003 елның 7 декабрендә дүртенче чакырылыш Россия Федерациясе Федераль Җыелышының Дәүләт Думасы депутаты итеп 24 нче Мәскәү бермандатлы сайлау округы буенча (Татарстан Республикасы) сайлана. Дәүләт Думасында «Бердәм Россия» фракциясе составына керә.

2007 елның 2 декабрендә «Бердәм Россия» Бөтенроссия сәяси партиясе тәкъдим иткән кандидатларның федераль исемлеге составында V чакырылыш РФ Дәүләт Думасы депутаты итеп сайлана (2007-2011 еллар).

2014-2017 елларда — «Агросила групп» ААҖ ендә генераль директор киңәшчесе, генераль директорның авыл хуҗалыгы буенча урынбасары. «Агросила групп» ЯАҖ генераль директоры киңәшчесе^[4][5].

2016 елда Татарстан Республикасы Арбитраж суды Гобәйдуллинны банкрот дип игълан итә һәм, 600 миллион сумнан артык бурыч түләүне таләп итеп, хөкем карары чыгара^[6].

Өйләнгән, улы бар.

• Татарстан Республикасының Атказанган икътисадчысы (2002);
• Татарстан Республикасы Президентының Рәхмәт хаты (2003);
• «Казанның 1000 еллыгы истәлегенә» медале (2005);
• Почёт ордены (2007)^[7].