Илдар Гыйльметдинов

1983 елда Казан дәүләт педагогика институтының физика-математика бүлеген «физика укытучысы» белгечлеге буенча тәмамлый. 1982—1984 елларда Казан консерваториясе каршындагы музыка мәктәбендә физика укытучысы, Олы Бортас урта мәктәбе директоры булып эшли.

1985—1986 елларда Совет Армиясе сафларында хезмәт итә, аннары комсомол эшендә: ВЛКСМның Кама Тамагы райкомының икенче секретаре, ВЛКСМның Актаныш райкомының беренче секретаре. 1989 елда «политолог» белгечлеге буенча ВЛКСМ Үзәк комитеты каршындагы югары Комсомол мәктәбенең көндезге-читтән торып уку бүлеген тәмамлый^[1]. 1990 елдан — ВЛКСМның Татар Өлкә Комитеты секретаре. 1992 елдан бирле — «Татарстан Республикасы яшьләр оешмалары Советы» идарәсе рәисе.

1994 елдан — Татарстан Республикасының балалар һәм яшьләр эшләре буенча Дәүләт комитеты рәисе урынбасары; 2001 елдан — Татарстан Республикасы Яшьләр эшләре һәм спорт министрының беренче урынбасары. 2003 елдан — 4 нче (2003—2007), 5 нче (2007—2011), 6 нчы (2011—2016), 7 нче (2016 елның 18 сентябреннән) чакырылыш РФ Дәүләт Думасы депутаты, «Бердәм Россия» Бөтенроссия сәяси партиясеннән кандидатларның федераль исемлеге буенча сайлана. 2007 елда «дәүләт һәм муниципаль идарә» белгечлеге буенча Төньяк-Көнбатыш дәүләт хезмәте академиясен, шулай ук Россия Федерациясе Президенты каршындагы Россия дәүләт хезмәте академиясен тәмамлый. 4 һәм 5 нче чакырылыш Дәүләт думасында Физик культура, спорт һәм яшьләр эшләре комитеты рәисе урынбасары; 6 нчы Дәүләт Думасында Мәгариф комитеты составына керә; 7 нче чакырылыш Дәүләт Думасында милләтләр эшләре комитеты рәисе һәм хисап комиссиясе рәисе булып тора^[2]. «Бердәм Россия» фракциясе әгъзасы^[3], фракциянең Эксперт-консультатив Советында.

«ТР яшьләр оешмалары Советы» рәисе. «Татарларның федераль милли-мәдәни автономиясе» ҖЧҖ Советы Рәисе (2007 елдан)^[4].

2003 елдан 2019 елга кадәр, IV, V, VI һәм VII чакырылыш Дәүләт Думасы депутаты вәкаләтләрен үтәү барышында 293 канун чыгару инициативасы һәм федераль канун проектларына төзәтмәләр кертү автордашы.

Өйләнгән, улы бар.

• «Казанның 1000 еллыгы истәлегенә» медале;
• Россия Федерациясенең атказанган яшьләр сәясәте хезмәткәре^[5];
• Татарстан Республикасының атказанган физик культура хезмәткәре;
• РФ Хөкүмәтенең Мактау грамотасы;
• РФ Президентының Рәхмәт хаты (2007 елның 18 октябрендәге Указ) — закон чыгару эшчәнлегендә актив катнашкан өчен^[6];
• РФ ФҖ Дәүләт Думасы Рәисенең Рәхмәт хаты;
• «Татарстан Республикасы алдындагы казанышлары өчен» ордены ― милләтара тынычлыкны һәм татулыкны ныгытуга зур өлеш керткәне, күпьеллык нәтиҗәле хезмәте һәм актив иҗтимагый эшчәнлеге өчен (2022)^[7];
• «Татарстан Автономияле Совет Социалистик Республикасы оешуга 100 ел» медале (2025)^[8];
• II дәрәҗә Мәскәү кенәзе Даниил ордены (2026, РПЧ)^[9].