Миләүшә Таминдарова

Миләүшә Таминдарова 1960 елның 13 маенда Казанда туа^[1]. Бөек Ватан сугышында катнашкан укытучылар Таһирә Гариф кызы һәм Әмир Таһир улы гаиләсеннән^[2][3]. Әтисе ягыннан апасы — җырчы Рәшидә Таминдарова^[4]. Ике сеңлесе — Альиса һәм Әлфия^[3].

1986 елда В. Г. Лукьянов сыйныфы буенча Казан дәүләт консерваториясенең хор дирижерлыгы кафедрасын тәмамлый^[1][5]. 1986—1988 елларда Казан педагогия институтының музыка факультетында эшли^[1][6]. 1990 елда Казан консерваториясе карамагындагы ассистентураны тәмамлап, дирижерлык кафедрасында укытучы булып эшли^[1][7]. 1991—1997 елларда профессор С. А. Казачков җитәкчелегендәге консерватория студентлары хорының хормейстеры була^[1]. 1994—2007 елларда Казан музыка училищесында хор дирижерлыгы бүлеге мөдире вазифасын башкара^[7][8]. 1997 елда опера студиясе карамагында хор оештыра һәм җитәкли^[7][9].

Параллель рәвештә, 2000—2007 елларда Максим Горький музее мөдире булып эшли^[10]. 2007 елда Татарстан Республикасы Министрлар Кабинеты карары нигезендә опера студиясе хоры нигезендә Татарстан Республикасы дәүләт камера хоры төзелә, аның җитәкчесе итеп Миләүшә Таминдарова билгеләнә^[11][12]. 2018 елда В. И. Ленин исемендәге мәдәни-ял комплексы каршында профессиональ булмаган һәвәскәр җырчылардан торган «Җыр театры»н оештыра. Миләүшә Таминдарова Татарстан Республикасында Бөтенроссия хор җәмгыятенең бүлек рәисе булып тора^[13].

Хор Россия Милли оркестры (җитәкчесе — Михаил Плетнев) белән Г. Геттиның «Жанна һәм чаңнар» (Жанна и колокола) кантатасы, Россия Федерациясе Оборона министрлыгының симфоник оркестры (дирижёр — Виктор Афанасьев) белән П. Чайковскийның «1812 ел» (1812 год) тантаналы увертюрасын башкара. 2000 елда хор «Аллилуйя» әсәре белән Софья Гобәйдуллинаның халыкара музыка фестивалендә катнаша. 2007 елда әлеге опера студиясе нигезендә Татарстанның дәүләт камера хорын оештыра һәм аның җитәкчесе.

Миләүшә Таминдарова җырчы буларак та билгеле. Репертуарында В.- А. Моцартның «Реквием»ы һәм С-dur мессасы, И. Гайднның «Месса-Терезия»се һәм В-dur мессасы бар. Татар дәүләт опера һәм балет театры белән АКШ, Алмания, Швеция, Чехиядә гастрольләрдә була.

• «Күренекле дирижёр сәләте өчен» махсус приз (Прага, Чехия)^[14];
• 2007 — Татарстанның атказанган сәнгать эшлеклесе^[1];
• 2017 — Татарстан Республикасы Мәдәният министрлыгының «Мәдәнияттәге казанышлар өчен» үкрәк билгесе^[15];
• 2021 — Татарстан Республикасының халык артисты;
• 2024 — Татарстан Республикасының Габдулла Тукай исемендәге дәүләт премиясе (Татарстанда татар хор мәдәниятен үстерү, таныту һәм саклап калу, «Татар хор музыкасы антологиясе» эше өчен)^[16][17];
• 2025 — «Татарстан Автономияле Совет Социалистик Республикасы төзелүгә 100 ел» медале (Татарстан Республикасының мәдәни-рухи мирасын саклауга зур өлеш керткәне өчен)^[18].