Нурлы (мәчет, Әлмәт)

2008 елда инициатив төркем Әлмәтнең «Алсу» («Агробистә») микрорайонында мәчет төзү тәкъдиме белән чыгыш ясый^[1]. 2009 елда Әлмәт шәһәре башкарма комитеты тарафыннан мәчет төзелеше өчен җир кишәрлеге бүлеп бирелә. 2010 елда төзелешкә беренче акчаларны Татарстан Республикасы Президенты Рөстәм Миңнеханов күчерә^[2]. Нәкъ шул вакыттан мәчетне төзү эшләре башлана. Шулай ук төзелешкә шәһәр һәм микрорайон халкы, хәйриячеләр һәм иганәчеләр матди ярдәм күрсәтә. 2017 елдан мәчетне финанслауга «Татнефть» ширкәте кушыла.

2020 елда мәчет манарасына ярымай куела.

Мәчетне ачу тантанасында Әлмәт шәһәре һәм районы имам-мөхтәсибе, Татарстанның Көнчыгыш төбәге казые Исмаил хәзрәт Сингатуллин^[3], Татарстан Республикасы мөфтиенең мөхтәсибәтләр белән эшләү буенча урынбасары Равил хәзрәт Зөфәров, Әлмәт шәһәре башкарма комитеты җитәкчесе Айнур Исхаков, шәһәр һәм район имамнары һәм башка рәсми затлар катнаша^[4].

Мәйданы 270 кв. метр тәшкил иткән ике катлы мәчет 100 кешегә исәпләнгән. Цоколь каты булган мәчеттә ир-атлар һәм хатын-кызлар өчен аерым тәһарәтханә, уку сыйныфлары, фарыз-заллар, никахлашу, исем кушу һәм имамнар өчен бүлмәләр бар. Рамазан аенда мәчеттә ифтарлар уздырыла. Мәчет газ, су, энергия белән тәэмин итү системаларына тоташтырылган, канализация системасы белән җиһазландырылган^[5].

Мәчеттә даими рәвештә биш вакыт намаз һәм җомга намазлары укыла.

Ул шулай ук мәгърифәт үзәге вазифаларын башкара. Биредә балалар һәм олылар өчен Коръән уку һәм ислам нигезләренә өйрәтү буенча курслар оештырылган. Изге Рамазан аенда мәхәллә кешеләре өчен ифтарлар оештырыла.

Мәчетнең имамы — Мәгъсум Хәлим улы Нуретдинов^[6].