Рәис Миңнеханов

Рәис Нургали улы Миңнеханов 1961 елның 8 июнендә Татарстан АССРның Теләче районы, Борчаклы Яз авылында туа^[1][2].

1978 елда берничә ай Саба районы Лесхоз бистәсендәге Саба урман сәнәгате хуҗалыгында эшче булып эшли, шуннан соң М. Горький исемендәге Мари политехника институтына укырга керә. 1983 елда әлеге уку йортын «урман хуҗалыгы» белгечлеге буенча тәмамлап, урман хуҗалыгы инженеры квалификациясен ала^[3][4].

1983 елдан Саба урман сәнәгате хуҗалыгында (леспромхоз) эшли: башта агач әзерләү остасы (1983—1984), аннары Сабабаш урманчылыгында урманчы ярдәмчесе (1984) була.

1984—1985 елларда — Кукмара районың Лубян эксперименталь агач кисү-эшкәртү заводы директоры, 1985—1986 елларда — Лубян урман пункты начальнигы.

1986 елдан кабат Саба урман сәнәгате хуҗалыгына эшкә кайта, анда материаль-техник тәэминат бүлеге начальнигы, соңрак Мишәбаш урманчылыгы урманчысы (1986—1990) булып хезмәт итә^[1].

1990—1999 елларда Татарстан Республикасы Урман хуҗалыгы министрлыгының Саба урман хуҗалыгы директоры вазифасын башкара^[1]. Авыл хуҗалыгын алып бару буенча хезмәтләр авторы^[1].

2001 елда авыл хуҗалыгы фәннәре кандидаты гыйльми дәрәҗәсен ала^[2].

1999—2004 елларда — 55 нче санлы Саба район административ-территориаль сайлау округыннан Татарстан Республикасы Дәүләт Советының II чакырылыш халык депутаты^[1][5].

1999 елның 3 ноябрендә Саба районы администрациясе башлыгы вазифасына билгеләнә һәм, бер үк вакытта, район Халык депутатлары советы рәисе вазифасына керешә. Бу вазифаларны ул 2005 елның 31 декабренә кадәр башкара^[1].

2006 елның 1 гыйнварыннан 2025 елга кадәр — Саба муниципаль районы башлыгы һәм Саба муниципаль районы Советы рәисе^[4]. Ул 2 нче санлы Саба сайлау округыннан Саба муниципаль районы Советы депутаты^[6], «Бердәм Россия» партиясе әгъзасы һәм муниципаль берәмлектәге партия бүлекчәсе секретаре^[7]. Миңнеханов җитәкчелек иткән еллардагы районның социаль-икътисади күрсәткечләре канәгатьләнерлек түгел дип бәяләнә^[8].

2025 елның сентябрендә Рәис Миңнеханов Татарстан Республикасы Саба муниципаль районы башлыгы итеп сайлана^[9].

Россия

• II дәрәҗә «Ватан алдындагы казанышлар өчен» ордены медале (2009 ел) — ирешкән хезмәт уңышлары һәм күпьеллык намуслы хезмәте өчен^[10]. Президент сараендагы тантанада Татарстан Республикасы Президенты М. Ш. Шәймиев тарафыннан тапшырыла^[11];
• «Россия дәүләт учреждениеләре хезмәткәрләре профсоюзына 100 ел» юбилей билгесе (2018)^[12];
• «Казанның 1000 еллыгы истәлегенә» медале^[13];
• «Бөтенроссия халык санын исәпкә алуны үткәрүдәге казанышлар өчен» медале (2002);
• «Россия Федерациясенең халык мәгарифе отличнигы» күкрәк билгесе (1995)^[13];
• Дуслык ордены (21 апреля 2026)^[14].

Татарстан

• «Татарстан Республикасы алдындагы казанышлар өчен» ордены (2021) — районның социаль-икътисади үсешенә зур өлеш керткән һәм күпьеллык нәтиҗәле хезмәте өчен^[15]. Президент сараендагы тантанада Татарстан Республикасы Президенты Р. Н. Миңнеханов тарафыннан тапшырыла)^[16];
• «Фидакарь хезмәт өчен» медале (2011)^[17];
• «Татарстан Республикасында җирле үзидарәне үстерүдәге казанышлар өчен» медале (2016) — җирле үзидарә органнары эшчәнлегенең нәтиҗәлелеген арттырудагы казанышлары, Саба муниципаль районының социаль-икътисади үсешенә керткән лаеклы өлеше өчен)^[18];
• Татарстан Республикасының атказанган урманчысы (1997)^[1][2].
• Татарстан Республикасының Мактау грамотасы (2003 ел)^[2][13];
• «Ватан алдындагы казанышлар өчен» орден медале (2009)^[19];
• Татарстан Республикасының Фән һәм техника өлкәсендәге дәүләт премиясе (2003 ел)^[1][20];
• Татарстан Республикасы Президент Аппараты җитәкчесенең Рәхмәт хаты (2000);
• Татарстан Республикасы Президенты Рәхмәте (2015, 2016)^[21][22];
• «Дуслык» ордены (2026)^[23].

Әтисе — Нургали Миңнехан улы Нургалиев (1930—2001), әнисе — Васига Мөбәрәкҗан кызы (1931 елда туган)^[24][25]. Ике ир туганы^[26]: Рифкать (1955 елда туган)^[27], Рөстәм (1957 елда туган)^[28].

Автоспорт белән шөгыльләнә^[29], ул — Россиянең спорт мастеры^[30].

Хатыны — Гөлсем Вәли кызы (1963 елда туган), Мишә авыл башкарма комитетының торак-коммуналь хуҗалык һәм салымнар буенча белгече^[31], «Фидакарь хезмәт өчен» медале кавалеры (2018)^[32].

Уллары — Азат (1985 елда туган), Нияз (1991 елда туган)^[31]. Икесе дә эшмәкәрлек белән актив шөгыльләнә, транспортка техник хезмәт күрсәтү һәм автоташулардан башлап, күчемсез милек белән идарә итүгә һәм шампиньон үстерүгә кадәрге төрле эшчәнлек өлкәләрендәге Татарстан ширкәтләрендә өлешләре бар. Өстәвенә, берничә фирмалары әтиләре җитәкләгән районда урнашкан^[33][34]. Мишә авыл җирлеге депутаты Азат Миңнеханов, шул ук вакытта, «Саба урман хуҗалыгы» фирмасының коммерция директоры вазифасын да үти^[35]. 2018 елда бу оешма урман утырту буенча сатулашуларда «Саба урманнары» ширкәте белән картель килешүендә гаепләнеп, Федераль монополиягә каршы хезмәт карары нигезендә гаепле дип табыла^[36].