Резеда Галимова

1966 елның 26 октябрендә Чистайда туган. Салих Сәйдәшев исемендәге Түбән Кама музыка укуханәсенең фортепиано (1986) һәм вокал (1992) бүлекләрен, «вокал сәнгате — академик җырлау» белгечлеге буенча Мәскәүнең Гнесиннар исемендәге Россия музыка академиясен (1998) тәмамлы. Ун елдан артык Түбән Каманың 3 нче санлы балалар музыка мәктәбендә фортепиано классында укыта. 1997 елдан Габдулла Тукай исемендәге Татар дәүләт филармониясенең халык уен кораллары дәүләт оркестры солисты.

Артистның концерт репертуарында Кар кызы (Снегурочка) ариясе («Снегурочка» операсы, Н. Римский-Корсаков), Людмила каватинасы («Руслан һәм Людмила» операсы, М. Глинка), Алтынчәч ариясе («Алтынчәч» операсы, Н. Җиһанов), И. Штраусның «Сказки Венского леса», Елена болеросы («Сицилийская вечерня» операсы, Дж. Верди), «Над Демой (Р. Яхин), «Соловей» (А. Алябьев), татар халык җыры «Эрбет»^[1].

ТР Дәүләт симфоник оркестры, ТР Дәүләт халык уен кораллары оркестры, «Яңа музыка» камера оркестры, ТР Дәүләт кыллы квартеты белән берлектә чыгыш ясый. ТР халык уен кораллары дәүләт оркестры составында Германиядә, Болгариядә, Португалиядә, Көньяк Корея, Россия (Санкт-Петербург, Мәскәү, Ульяновск, Стәрлетамак, Яр Чаллы, Әлмәт, Түбән Кама, Бөгелмә, Лениногорск, Чистай) гастрольләрдә була^[1].

«La Primavera» Казан камера оркестры, Казан югары танк команда оркестры, Россия дәүләт музыкаль телерадиоүзәгенең «Хор җырлау осталары» академия зур хоры концерт программаларында катнаша^[2].

Резеда Галимова катнашындагы соло концертлар һәм программалар:

• «Классика на бис»;

• «У врат обители святой. Творчество С. Рахманинова»;
• «Пушкин и музыка»;
• «Снежная фантазия»;
• «Музыка русских композиторов для детей»;
• «Мировая классическая музыка для детей»;
• «Золотой век России. Русский классический романс XIX века»;
• «Вам песня посвящается…». Совет классик композиторлары иҗаты;
• «Оныта алмыйм…». Композитор Рөстәм Яхин иҗаты;
• «Вальс турында вальс…». Композитор Сара Садыйкова иҗаты;
• «Күңелем Сәйдәш белән». Композитор Салих Сәйдәшев иҗаты.
• «Молодым о подвигах отцов» концерт программасы.

Резеда Галимова башкаруындагы әсәрләр «Татарстан оркестрлары» сериясендәге компакт-дискларга кертелгән. Җырчы Татарстан Республикасы радиосында татар һәм рус композиторлары әсәрләре циклын яздыра, шулай ук төрле телевизион тапшыруларда («Җырлыйк әле», «Алтынчәч» һ.б.) еш катнаша.

Татарстан Республикасы делегациясе составында татар милли бәйрәме «Сабантуй»да (Төркия, АКШ, Азәрбайҗан, Үзбәкстан, Казакъстан, Украина, Белоруссия, Литва һәм Россиянең Мәскәү, Архангельск, Екатеринбург, Әстерхан, Томск, Омск, Чиләбе һәм Владивосток шәһәрләрендә) катнаша. Татарстан Республикасы мәдәнияте көннәрендә (Төркия, КХР, Казахстан, Свердловск һәм Киров өлкәләре, Иваново, Санкт-Петербург, Новосибирск, Йошкар-Ола, Владивосток) чыгыш ясый; хөкүмәт делегацияләре составында берничә тапкыр Татарстан Республикасын Һиндстанда, Германиядә, Финляндиядә, Швециядә, КХР, Латвиядә, Эстониядә, Украинада тәкъдим итә^[1].

2004 елда АКШта Литл-Рок һәм Нью-Йорк шәһәрләрендә «Grand Prize» халыкара вокалистлар конкурсы лауреатларының гастрольләре турында, «Карнеги-холл» концертлар залы сәхнәсендә, ә 2005 елда, Россия мәдәнияте көннәрендә Халыкара классик сәнгатьне үстерү хәйрия фонды һәм Россия мәдәният институты чакыруы буенча, Баден шәһәрендә (Австрия) чыгыш ясый.

2013 елның апрелендә Европа Сараенда (Страсбург ш., Франция), «Универсиада — 2013»не тәкъдим итеп, сольный концертын куя.

2016 елның 10 декабрендә Габдулла Тукай исемендәге Татар дәүләт филармониясендә Анатолий Шутиков оркестры озатуында Галимованың юбилей соло концерты уза. Татарстан Республикасының халык артисты бөек классиклар һәм яңа заман композиторлары — Чайковский, Рахманинов, Глинка, Алябьев, Дунаевский, Яхин һәм Яруллин әсәрләрен башкара^[3][4].

2018 елның августында Эль-Джем шәһәрендәге (Тунис) тарихи амфитеатр сәхнәсендә, XXXIII Халыкара симфоник музыка фестивалендә, сольный концерт белән чыгыш ясый.

Резеда Галимова шулай ук күп кенә бәйге-фестивальләрнең жюри рәисе һәм әгъзасы булып тора:

• Салих Сәйдәшев исемендәге ачык республика вокалистлар конкурсы жюри әгъзасы (Түбән Кама);
• Илһам Шакиров исемендәге «Татар моңы» яшь башкаручылар телевизион конкурсының жюри әгъзасы (Казан);
• «Наше время — Безнен заман» Татарстан Республикасы эшләүче яшьләр иҗатының ачык республика телевизион фестивале жюри рәисе^[5];
• Татарстан Республикасы ВЭП Электропрофсоюзының үзешчән сәнгать фестивале жюри рәисе^[6];
• Россия Федерациясе театр эшлеклеләре берлеге әгъзасы.

• «Татар җыры» республика вокалистлар конкурсы лауреаты (1995);
• С. Сәйдәшев исемендәге III Республика вокалистлары конкурсы лауреаты (1996)^[7];
• «Академик җырлау» номинациясендә Мәскәүдә узган Халыкара Дельфлар уеннары лауреаты (2000);
• Татарстан Республикасының атказанган артисты (2001);
• «Grand Prize» халыкара вокалистлар конкурсы (Италия) лауреаты (2003);
• «Казанның 1000 еллыгы истәлегенә» медале (2005)^[8];
• Татарстан Республикасы Прокуратурасының «Канунга хезмәт иткән өчен» мактау тамгасы (2007);
• РФ Оборона министрлыгының «Хәрби бердәмлекне ныгыткан өчен» медале (2009);
• Татарстан Республикасының халык артисты (2011);
• Татарстан Республикасы Мәдәният министрлыгының «Мәдәнияттәге казанышлары өчен» күкрәк тамгасы (2011);
• Татарстан Республикасы Президентының Рәхмәт хаты (2016)^[7];
• Казан мэрының Рәхмәт хаты (2016);
• Россия Федерациясенең атказанган артисты (2018)^[9][10];
• «Вокал. Хатын-кыз тавышы» номинациясендә Татарстан Республикасының Илһам Шакиров исемендәге премиясе лауреаты (2020; 2021)^{[11][12][13][14]}.