Халыкара таможня хезмәткәрләре көне
Халыкара таможня хезмәткәрләре көне (ингл. International Customs Day , рус. Междунаро́дный день тамо́женника) — таможня хезмәтләренең һөнәр бәйрәме, 1983 елдан башлап, ел саен 26 гыйнварда билгеләнә.
Тарихы
1947 елда Европада 13 ил бердәм товар номенклатурасын формалаштыру һәм таможня процедураларын стандартлаштыру өчен махсус комиссия төзү турында карар кабул итә. Әлеге комиссиянең эш нәтиҗәләре Таможня хезмәттәшлеге советын оештыру өчен нигез булып тора, тиешле конвенциягә 1952 елның декабрендә кул куела. 1953 елның 26 гыйнварында Брюссельдә Бөтендөнья таможня оешмасының беренче сессиясе уза, анда 17 дәүләт вәкиле катнаша[1]. Оешма таможня системасын җайга салу һәм унификацияләү, таможня законнарын һәм технологияләрен камилләштерү максатыннан төзелгән[2]. Бөтендөнья таможня оешмасы катнашучы илләрнең таможня хезмәтләрен инструкцияли, координацияли, икътисади җинаятьләр — законсыз үткәрү, озата барган документларны бозу очраклары, контрабанда кертү белән көрәшә.
Халыкара таможня хезмәткәрләре көнен беренче тапкыр 1983 елда, Бөтендөнья таможня оешмасының утыз еллык юбилее уңаеннан билгеләп узалар[3].
2023 елда бәйрәм таможня органнарында белем алмашу һәм һөнәри горурлык культурасын үстерүгә багышлана[2].
Традицияләре һәм бәйрәм итү
Федераль таможня хезмәте рәсми сайтында түбәндәге мәгълүматны табарга мөмкин[1]:
«Халыкара таможня хезмәткәре көне — бөтен дөнья таможня хезмәтләренең теләктәшлек күрсәтү өчен сәбәп кенә түгел, ә глобаль икътисадый үзгәрешләр шартларында эшкә нәтиҗә ясау мөмкинлеге дә».
Халыкара таможня хезмәткәрләре көнендә төрле илләрдә очрашулар, матбугат конференцияләр оештырыла, алдынгы хезмәткәрләрне һәм ветераннарны билгеләп узалар. Профильле уку йортларында булачак таможня эше белгечләре өчен бәйрәм чыгышлары, түгәрәк өстәлләр, лекцияләр һәм семинарлар оештырыла.
Кызыклы фактлар
- 2023 елгы мәгълүматлар буенча, Россия таможня хезмәтендә 70 000 кеше исәпләнә.
- Айга Аполлон 11 галәм корабында очкан космонавтлар җиргә кайтканда таможня аша узарга тиеш булалар. Бу айдан ташлар һәм табигый полиминераль агрегатларны декларацияләү өчен кирәк.
- 1985 елда Перу таможнясында Экватордан китерелгән бал партиясе туктатыла. Тикшерү вакытында балга кокаин кушылганлыгы билгеле була. Әмма аны кешеләр түгел, Кока куаклы үсемлеге үскән кырлардан бал кортларының серкә җыюы нәтиҗәсендә килеп чыкканлыгы ачыклана.
- Урта гасырларда Чехиядә торак пункт шәһәр җирлеге статусына ия булсын өчен, анда мөстәкыйль хөкем йорты, сыра кайнату урыны һәм таможня булырга тиеш.
- Франциядән Америка Кушма Штатларына очучы хатын-кыз таможнядан үткәндә, букчасындагы алма өчен тоткарлана. Америка Кушма Штатларында чит ил дәүләтләреннән кертелгән җиләк-җимеш декларацияләнергә тиеш, шуңа күрә букчадагы алма санкцияләнмәгән товар булып санала һәм аның өчен штраф түләргә туры килә.
- Беренче таможня посты булып борынгы Пальмира тирәсендә урнашкан урын тора. Бу урында археологлар чик аша чыгарганда һәм керткәндә салым салынган товарларның ташка уеп язылган исемлеген табалар[4].
Шулай ук карагыз
Искәрмәләр
- ↑ 1 2 Международный день таможенника – 26 января. Федеральная таможенная служба (26 гыйнвар 2022). Мөрәҗәгать итү датасы: 23 гыйнвар 2024.
- ↑ 1 2 Международный день таможенника. МИА «Россия сегодня» (26 гыйнвар 2023). Мөрәҗәгать итү датасы: 23 гыйнвар 2024.
- ↑ Макеева, Ирина. День 26 января в истории. Парламентская газета (26 гыйнвар 2023). Мөрәҗәгать итү датасы: 23 гыйнвар 2024.
- ↑ 5 октября отмечается День таможенника России: история и традиции, что делают таможенники, почему они нужны, где в мире появилась первая там
Әдәбият
- {{{заглавие}}} // Таможенная политика России на Дальнем Востоке. — 2007. — № 2 (39).
